E ui ina laavasa mai le tele o fita ma peau fafati o le soifuaga nei, peitai e auga e tasi finagalo faagaeetia pe a auseuga a manū se faamoemoe ina ua fesilafai i le lagi e mamā ma le soifua manuia.
O le ala lea o le manatua o Afia i le mālū ma le matagofie o lona vao, i se agaga e molimoli ai mea i faletui se‘i sula le viiga o le Matai e ou nei manū ua tau ai lau o le faamoemoe. O polokalame faagasolo o le aso faamanatu o le lotu, na siitia le taulaga faafetai e le afioga i le Sea manumalo malolo ia Setu Faaniniva o le Faasinoti Metotisi a Kuiniselani.
O le Tatalo faafetai sa fofogaina e le afioga i le aloalii ia Galumalemana Naea Tagaloa Harry Timoteo, faatoesega saunia e le tofa ia Leu Liu ma manaoga sa faaleoina e le susuga i le A‘oa‘o ia Tama Si‘a. Sa faitauina le Afioga Paia a le Atua e le afioga i le Sea o le Ekalesia Evagelia Uesiliana Metotisi, le susuga ia Rev Falema‘i Mika. O le tala o le lotu faasolo a le aiga sa lauina lava e le failautusi, o le Taitaifono foi lea, le afioga ia Galumalemana Naea Tagaloa Harry Timoteo, o ia foi sa fai ma fofoga o le aso.
E lata i le ono sefulu i latou na auai i le lotu o lenei tausaga, Aso Toonai 21 o Ianuari ona o nisi na asiasi atu i le lotu faamanatu a le aiga i Sydney faapea nisi sa feagai ma galuega. Talu mai le tausaga ua mavae, ua to‘a 8 tagata fou ua faaopoopo i totonu o le aiga. O nisi o Faafeagaiga taulagi poo lupe faalele o loo faamalumalu e iai le mafutaga i Brisbane e aofia ai le susuga ia Rev Kueva ma Selesa Tuimaugapo, le faafeagaiga ia Pastor Veve Campbell, Rev Falema‘i & Kelly Mika (Sea Ekalesia Evagelia Uesiliana Metotisi) ma le susuga i le A‘oa‘o ia Tama Si‘a (Ekalesia EFKS).
O i latou o tutū mai i matagi‘olo e taitaia le aiga i lenei paeaiga:
Taitaifono/Failautusi – Afioga i le aloalii Galumalemana Naea Tagaloa Harry Timoteo (o se tasi foi o faipisinisi iloga i totonu o Brisbane i faleoloa o laei ma containers faapea le auaunaga a le nofoaalo ia Mika ma Dianne Nansen i laei lolomiina); Sooupu – Afioga ia Maualaivao Tusitala Timoteo; Tuetupe – Tofa ia Leu Liu Leu (faipisinisi e tautua le atunuu i le fesifiaina o meāfale). Na mae‘a le taligasua ona alo lea i faafiafiaga masani ae taualuga i se fonotaga e fālē ai foi ni mataupu ‘anoa mo le agai atu i le isi fonotaga o le tausaga fou. Na fai ma sui le Fetalaiga ia Auimatagi Tuā‘au Timoteo e feagai ma faaaloaloga auā se inati o le aufaigaluega paia a le Atua. E ui lava ina fai sina vevela o lea aso, ae na vaaia le agalelei o le Tamā o i lagi ina ua faaiuina ma le manuia fuafuaga uma sa faataatitia ma tulimatai mai i ai lenei tausaga 2012.
