O tala matuia na faalogoina ile Aso Faraile ma le faaiuga o le vaiaso ile maliliu o tagata e 84 ise osofaiga matautia i totonu o Farani a‘o faagasolo le aso malolo faaletausaga a le atunuu, le Bastille Day. O le alii Mosalemi o Mohamed Bouhlel, 31 tausaga, ose alii Tunisia ua leva ona aumau i Farani, na ia faaaogāina se loli lapoa la‘u uta e soli ai le toatele a‘o faatasi i fiafiaga o le Bastille Day.
O le matautia o lenei osofaiga e ese le 84 na maliliu, ae ova ma le 250 lea aofai o le au manunu‘a. E aofia ai tagata matutua, tamaiti laiti, fafine ma tamaloloa, na soli faasolo atoa e le loli na aveeina e lenei alii.
Ua vave ai le fiafia a le vaega a le ISIS (Islamic State of Iraq and Syria) ma faafetaia le mea matautia ua fai e Bouhlel. Fai mai ISIS o lenei alii o se tasi o latou soo ua faataunuuina le finagalo o Allah.
Peitai, na ta‘ua e le aiga o lenei alii, e lei alu lava ia ile malumalu (mosque) o lea faatuatuaga Mosalemi e tatalo pe lotu ai. O ia foi o se tagata fasi toalua, ma leaga ana amio. Peitai, e lei solomuli ai le opogi e ISIS o galuega a lenei tagata.
O le sefulu ai lea o osofaiga faa-Mosalemi i totonu o Farani talu mai le amataga o le tausaga ua tea. E 232 le aumaliliu mai ia osofaiga ma e faaluaina le aofai o le ‘au manunu‘a.
