Ua saluvale lautaamu o Aopo i manatunatuga ma le vaai mamao a nisi o le aufaifaatoaga e faapea ai a sili atu i le ‘afa o le tupe na tuuina mai e faamāmā avega i le aufaifaatoaga i aafiaga o le faamai o le KOVITI-19 o le a faasafua mai mo i latou. O le vaiaso na mavae nei na faalauiloa ai e le Ofisa Sili o Pulega o le Matagaluega o Faatoaga ia Tilafono David Hunter le faasoasoaina o lea seleni ua iai nei.
“E 2.5miliona o le a tuuina atu i le Ofisa o Suesuega Faasaienisi i Vailima le SROS, e sailia ai ni auala e mafai ai ona fausia mai ni oloa i fua o faaeleeleaga a le atunuu, e pei o le falaoamata, o le suauu ma isi ina ia lē motusia le maua pea o taumafa mo le atunuu, e tuuitiitia ai foi le faalagolago atu i atunuu i fafo i ia oloa.”
Sa faailoa e Tilafono o nei oloa o loo tatou aumaia mai atunuu i fafo ma afai nei ae motusia vaa la’uoloa e omai i le atunuu, pe afai e ono oo atu i se tulaga lē lelei lava lenei faama’i o fea nei o le a faalagolago i ai o tatou tagata.
“E mama’i foi le aufaifaatoaga i fafo ma le aufailafumanu ma le autautai, e ono afaina ai foi le toe oo mai o mea taumafa o loo masani ai tatou, a’o tupu mai ai la se tulaga faapea ia ae ua mafai ona maua ia oloa e ala mai ia tatou fua o faaeleeleaga.”
E $20,000 ua tuuina atu i le matagaluega e tapena ai le puipuiga o lo latou saogalemu i ofisa e pei o le Faasu (Quarantine), o le vaega o faigafaiva. “Ona e tatau ona puipuia le aufaigaluega aua le oo mai o vaa i’a e sasaa mai latou faiva a’o puipuia lelei le au tautai ma tagata faigaluega o le matagaluega.”
E $6000 ua tuuina atu e faia ai polokalame faalauiloa a le matagaluega, e pei o faasalalauga i leitio ma televise, o nusipepa, o faaaliga, o faailoilo i tafāala auā le faailoa o tulaga o loo faatino ai faasao ma galuegafai a le matagaluega. O meaai mo lafumanu faapea ai vailaau faafomai mo lafumanu o le a faaaluina ai le $125,000. E tatau ona maua meaai maloloina a manu ia tausi lelei auā o tatou aano o manufasi ia e tua i ai, pe afai ae lē toe oo mai se vaa o loo auina mai ai aano o manufasi e pei o le moa lea o loo auina mai Amerika.”
O le manatu o le matagaluega o loo ave le faamuamua i laau e vave tali mai poo laau totō ia e vave ona fua mai, lea ua faamatuu atu ai le $820,000. O lea tupe o le a faatauina ai fatu o laau totō, laau faisua, ma laau o fualaau’aina mata.
O se tulaga o loo faapea mai se tasi o Faifaatoaga e lē o manao e faailoa lona suafa, “Ua tupu soo tele lenei mea, na ona ta’u o faifaatoaga ae ese tagata o loo manuia ai.”
Ae o loo faailoa e Tilafono o le unai a le matagaluega ina ia lē gata na o le aufaifaatoaga e faasafua i ai lea faamāmā avega ae ia aofia ai tagata o loo iai le naunautaiga e fai sina faatoaga i tuafale e tali vave mai mo nei taimi leaga.
Ua faailoa foi e lē na o le pau ai lea o le fesoasoani o loo iai foi nisi o fesoasoani lea o loo faagasolo lava i le taimi nei lona faasafuaina atu.
O nisi o le aufaifaatoaga o loo faapea mai ma’imau pe ana tuulima atu lava ia i latou lea fesoasoani, ona e lē o mailoa i le taimi nei pe tuuina atu le seleni i le tama a le loomatua ia e faatau ai lava e ia ana fatulaau, pe o le a tuuina atu foi i nuu ma afioaga, ma faalapotopotoga e faatau e latou fatulaau.
O le falaoamata e gaosi mai le ‘ulu ua leva ona faia i ai suesuega a le SROS, o nisi o tala o loo faapea mai e lē o i se tulaga lelei ona e mau le taimi e maua ai le ulu mau foi taimi e leai ai se fuata, ae ua leva ona faatagisia e lea faalapotopotoga ni masini mo le faatinoga o lea tulaga e saili ai poo ā ni oloa e ao ona gaosia mai i fua o faaeleleleaga a le atunuu mo le tali atu i le manaoga e lē gata o Samoa nei ae o le auina atu i fafo i maketi o loo manaomia.
