iv. Atina‘e Tetele
Oloo faaauau pea le ave o le faamuamua a le Malo i le faaleleia ma le fausiaina o atinae tetele. O le tupe atoa oloo fuafuaina mo le Vaega o Atinae Tetele oloo siitia i le $3.1 miliona pe a faatusatusa atu i le tausaga faaletupe oloo faagasolo.
Eletise:
E $11.6 miliona se vaegatupe ua faaagaga mo le Faalapotopotoga o le Malosiaga Tau Eletise. Oloo aofia ai i lenei vaegatupe le $5.1 miliona e totogiina ai le auaunaga faapitoa e patino i le auina atu o le eletise i nuu i tua (CSO). Oloo faaagaga se vaegatupe e $12.8 miliona mo le Faalapotopotoga o Suavai. E 3% oloo siitia ai mai le tala o le tupe 2011/2012. Oloo aofia ai i lenei vaegatupe le $8.4 miliona oloo faatupeina e le Malo o Europa mo le faaauauina pea o atinae tau le suavai. E $4.4 miliona oloo faaagaga mo le faatupeina o le auina atu o le suavai i nuu ma alalaga i tua (CSO).
Auala ma Ala Laupapa:
E $32.4 miliona le tupe ua faaagaga mo le fausiaina o auala ma ala laupapa ua ave iai le faamuamua a le Malo e faatinoina i le 2012/2013 e aofia ai ma galuega faaleleia faifaipea. E 4% e siitia ai pe a faatusatusa i le tausaga ua mavae. O lenei vaegatupe e faamatuu atu i le Faalapotopotoga o Felauaiga i le Laueleele.
Fesootaiga Faatekonolosi
I le vaega o fesootaiga faatekonolosi, o nisi nei o tupe o le a faamatuuina i ai mo le faaauauina o polokalame oloo ave i ai le faamuamua i le 2012/2013.
• E $1.8 miliona o le a faamatuu atu e faatupe ai galuega a le Ofisa o Pule Faatonu. O le siitaga e 15% e faatupeina ai tau faaopoopo mo le faatuina o le Ofisa o le Pule Faatonu e aofia ai ma isi vaega.
• E $2.6 miliona oloo faaagaga mo le faatinoina o polokalame a le Matagaluega o Fesootaiga.
v. Atinae o Pisinisi
O le a faaauau pea le lagolago a le Malo i le aufaipisinisi laiti e ala i le faamatuuina atu i ai o vaegatupe nei:
• $400,000 e avea ma sao o le Malo i le faatinoina o galuega a le Faalapotopotoga o Pisinisi Laiti (SBEC).
• E $100,000 e faamatuu atu mo le atinaeina o le vaega tumaoti. E $3.7 miliona oloo fuafuaina e faatupe ai galuega suesue a le Faalapotopotoga Faasaienisi a Samoa e lagolago ai i le atinaeina o le aufaipisinisi.
vi. Atinae o Turisi
O le a faaauau pea le lagolagoina e le Malo o le atinae o turisi ona o le tāua o le sao o lenei foi Vaega i le faatupulaia o le tamaoaiga.
• E $11.6 miliona o le a faamatuu atu i le Faalapotopotoga o Tagata Maimoa mai Fafo. O le 42% o lenei vaegatupe oloo fuafua e faaaluina i le maketiina o Samoa i Ausetalia ma Niu Sila.
