ii. Soifua Maloloina
Oloo tumau pea le lagolago a le Malo i lana manulauti o le “Samoa Maloloina” e ala i ana galuega ua faataatitia mo le tausaga faaletupe 2012/2013.
Lau afioga i le Fofoga Fetalai ma le mamalu i Sui Usufono, o lea ua iai se faaopoopoga e $2.0 miliona tala i tupe ua faatatauina pe a faatusa i le tausaga faaletupe 2011/2012 i lalo o le Vaega o le Soifua Maloloina ma o lea siitaga o le a saga faamautu ai le ausia o le manulauti a le Malo e pei ona faailoa atu muamua. Mo le tausaga faaletupe 2012/2013, e $71.6 miliona tala se vaegatupe ua faaagaaga mo lenei vaega lea ua fuafuaina mo vaega autū e pei ona tuuina atu faapenei:
• E $6.1 miliona tala lea ua fuafuaina mo le Matagaluega o le Soifua Maloloina mo ana galuega faatino ma e 11% ua sili atu ai pe a faatusa i le tausaga ua mavae. O le siitaga i vaega tupe faaagaga o le a saga faamausali ai foi ma le naunautaiga a le Malo i le faamuamua o le Faalauiloaina o le Ola Saogalemu, Puipuiga mai Faamai faapea le siitia maualuga o le auaunaga faasoifua maloloina i totonu o le atunuu.
• $59.3 miliona tala mo le Auaunaga Faasoifua Maloloina i totonu o le atunuu, ma e 2% ua sili atu ai lenei fesoasoani pe a faatusa i le Tala Faatatau o le Tupe 2011/2012.
• $5.0 miliona o le a tuuina atu e lagolago ai i galuega a le Faalapotopotoga Faavae Tau Fatuga‘o a Samoa.
• E $10.5 miliona tala mo le Polokalame o le auina atu o gasegase i atunuu i fafo mo togafitiga. O vaegatupe mo lea polokalame ua siitia maualuga i le 173% pe a faatusa i le 10 tausaga ua tuanai atu.
• O le Faalapotopotoga o le ma‘i Suka o le a faamatuuina atu i ai se vaegatupe e $50,000 e fesoasoani ai i ana polokalame faatino. O lea foi ua fuafuaina e tuuina atu fesoasoani tupe e $30,000 i le Faalapotopotoga o le Samoa Aids Foundation ma le $40,000 mo le Faalapotopotoga o le Mai o le Kanesa i totonu o le atunuu.
• O le a faaauauina foi le fesoasoani a le Malo i le Aoga Faafomai o le Oceania University of Medicine ma e $100,000 se vaegatupe lea ua faaagaaga mo lea faamoemoe i le tausaga fou.
iii. Faatoaga
Ina ia faamalosia pea le lagolago a le Malo i le toe lalagaina o le Atinae o Faatoaga, o lea ua faamatuuina atu ai vaegatupe nei i lana Tala Faatatau Autu o le Tupe 2012/2013 mo vaega tetele e pei ona faailoa atu faapenei:
• E $12.8 miliona tala se vaegatupe ua faamatuuina atu i le Matagaluega o Faatoaga e lagolago ai i ana galuega faatino lea e aofia ai faaopoopoga i vaega autu e pei o le Vaega o Suesuega o Laau Toto, Vaega o Manu ma Manu Fasi, Vaega o Faiga Faiva faapea le Auaunaga i Faiga Faavae, Fuafuaga ma Fesootaiga. O nisi o vaega autu o lenei faatupega e aofia ai vaega ua ta‘ua i lalo:
• $329,000 tala lea ua faaagaaga mo le faaauauina o le Polokalame mo le uunaia o le toe totoina o le koko, popo ma le kofe.
• E $300,000 tala se vaegatupe ua faatatauina mo le Faaaliga o Faatoaga.
