Faavae o Tupe Maua
I le vaega o tupe maua, e fiafia lava e faailoa atu e lē o iai se fuafuaga a le tatou Malo e faaopoopo tupe maua mamā e ala lea i le siitia o lafoga e faatupe ai le tala o le tupe 2012/2013.
O lenei faaiuga ua alagatatau lea ona oloo maitauina pea le tulaga vaivai o le faatupulaia o le tamaoaiga ma oloo fuafua e faaauau atu i le tausaga 2012/2013.
Oloo iai le faamoemoe o le Malo e faaauau pea le aoina mai o tupe maua e ala i le faatinoina o faiga faavae tau lafoga oloo iai i le taimi nei.
Oloo fuafua e siitia i le 5.6% a tatou tupe maua i le tausaga faaletupe 2012/2013, ma o lenei siitaga oloo ogatasi ma le siitia o le tau o le soifuaga.
I le tulaga o tupe maua mai fesoasoani a tatou paaga mai fafo, oloo fuafuaina e siitia i le $19.6 miliona e aofia ai ma le $41.0 miliona oloo tuuina sa‘o (direct budget support) mai le tala o le tupe a le Malo.
Atina‘e e Faamuamua
O le aofaiga o le tupe faaalu o lenei tala o le tupe e $774.27 miliona, e 4% e maualuga ai nai lo le tausaga faaletupe 2011/2012.
O le fuafuaina mai o tupe faaalu sa tele se galuega sa faatino ina ia mafai ona fetuunai e matagaluega vaegatupe ina ia ave le faamuamua i atinae oloo manaomia tele le faatinoina ia ogatasi ai ma le Taiala o le Atinae o Samoa 2012-2016.
O polokalame ua ave i ai le faamuamua a le Malo i lenei tala o le tupe oloo folasia atu e faapea.
i. Aoaoga
Oloo faaauau pea polokalame a le Malo i le aotauina ma le siitia o le tomai o faiaoga ina ia ausia e alo ma fanau o Samoa le maualuga o le tulaga faale-aoaoga e ala i le faatotogaina o aoga i vaega uma oloo moomia e faatino ai galuega faafaiaoga atoa ai ma le toe faaleleia o le tele o faleaoga.
Ina ia faamausali foi le atinaega o aoga i totonu o le atunuu, o lea ua iai se faasiliga i vaegatupe ua faatatauina i lalo o le Vaega o Aoaoga mo le tausaga fou ma ua avea lea ma pine faamau o le lagolago a le Malo i le uunaia o le tulaga tau i aoaoga i totonu o le atunuu. O vaega autu oloo aofia i totonu o le vaega o Aoaoga mo le Tausaga Faaletupe 2012/2013 e faamatalaina atu faapea:
• $50.4m ua faaagaaga mo le Matagaluega o Aoga, Taaloga ma Aganuu aua ana galuega faatino.
• $5.0m mo aoga a Ekalesia faapea Aoga Tumaoti.
• $11.5m se vaegatupe o le a faamatuuina atu i le Iunivesite Aoao o Samoa (NUS).
• $2.09m mo le Pulega o Faailoga Tusi Pasi Taualoa (SQA).
• $2.2m mo le faatauina o tusi ma api aoga mo aoga i nuu i tua.
• $1.2m o le a faamatuu atu e fai ma sao o le malo i le Polokalame e faamamaavega ai i pili o aoga a le fanau lea oloo fesoasoani mai ai Malo o Ausetalia ma Niu Sila i lona faatupega ma e $3.9m tala lea ua tuusa‘o mai e ia Malo i le Tala o le Tupe mo lenei faamoemoe.
