Vaaiga Lata Mai
I se vaaiga lata mai, o le a feagai pea Samoa ma luitau ona o tulaga lē mautonu oloo iai le tamaoaiga o le lalolagi. E tatau la ona faatino faiga faavae ma taiala talafeagai ina ia tuu māmāina ai le aafia ona o faaletonu o le tamaoaiga o le lalolagi, faapea le ausia o a tatou manulautī oloo aiaia i totonu o le Taiala mo le Atinae o Samoa 2012-2016. E tatau foi ona matua galulue vaavaalua faiga faavae tau tupe (monetary policies) ma le faagasologa o le tala o le tupe (fiscal policies) ina ia ausia se siosiomaga e talafeagai mo le aufaipisinisi faapea le faaleleia o le auaunaga mo le atunuu lautele.
I le agai atu i le lumanai, e tāua le mataitu toto‘a o le faagasologa o le tala o le tupe a le Malo. Ua maitauina foi le maaleale ua iai nei le malosi mo fefaatauaiga ona o fesuiaiga o le tau o le tala Samoa (exchange rate appreciations).
O lona uiga e tatau ona mataitu toto‘a ia vaega ina ia tatau foi ona faaauau pea le faatinoga o suiga talafeagai ina ia siitia tulaga tau tupe a Faalapotopotoga Tumaoti a le Malo.
Taiala o le Tala o le Tupe
O le tulaga vaivai o le tamaoaiga faatasi ai ma le siitai o le tau o le soifuaga aemaise le tuuitiitia o tupe faaagaaga mo fefaatauaiga, e manaomia ai le fuafua tatau o faiga faavae tau tupe ma le faagasologa o tupe faaalu a le Malo.
O lona uiga o le a faaauau pea le unai o tupe faaalu a le Malo (expansionary) ina ia mafai ona maua e tagata ma pisinisi seleni e faaalu ina ia taavili le tamaoaiga.
E leai foi se faamoemoe e siitia lafoga ma tiute.
Ou te manatu o se fuafuaga talafeagai lea tulaga aua ua tau to‘a lo tatou tamaoaiga. I le tulaga o faiga faavae tau tupe (monetary policies), o le a faaauau pea le tulaga tatala o loo iai nei ina ia maua pea tupe nono aua le faatupeina o atinae manaomia.
I lona aotelega, o le tala faatatau autu o le tupe 2012/13, o loo fuafua e ausia se faasiliga o tupe faaalu nai lo tupe maua e tusa lea ma le 6.1% o le tuufaatasiga o le tamaoaiga. Ma o le a faatupe uma lea vaega mai tupe faameaalofa mai fafo ma nogatupe e māmā tului.
