E leai se fuafuaga a le Malo e siitia lafoga ma tiute totogi e faatupe ai se isi vaega o fuafuaga mo galuega o le isi tausaga faaletupe o lumanai e pei ona faataoto mai i le tala autu o le tupe mo le tausaga e 2012 i le 2013. O le saunoaga o le tala autu o le Tupe ua folasia e le Minisita o Tupe le afioga Faumuina Tiatia Liuga ua ia tautino ai e le o iai se fuafuaga e siitia lafoga ma tiute e faaopoopo i tupe maua mamā.
O lea faaiuga e pei ona faaalia e le minisita, ua alagatatau lea ona oloo maitauina pea le tulaga vaivai o le faatupulaia o le tamaoaiga ma oloo fuafua e faaauau atu i le tausaga 2012/2013 lea tulaga. Oloo iai le faamoemoe o le Malo e faaauau pea le aoina mai o tupe maua e ala i le faatinoina o faiga faavae tau lafoga oloo iai i le taimi nei.
Oloo fuafua e siitia i le 5.6% tupe maua i le tausaga faaletupe 2012/2013, ma o lea siitaga oloo ogatasi ma le siitia o le tau o le soifuaga.
I le tulaga o tupe maua mai fesoasoani a paaga mai fafo, oloo fuafua e siitia i le $19.6 miliona e aofia ai ma le $41.0 miliona oloo tuuina sa‘o (direct budget support) mai le tala o le tupe a le Malo. E 774 miliona 270 afe le aofaiga o tupe faaalu ua faataoto i le tala autu o le tupe ua taoto nei i le Palemene, ma e 4 pasene ua maualuga ai nai lo le tausaga faaletupe o iai nei lea e faaiuina i le faaiuga o le masina nei o Iuni.
Faaalia e le minisita o le fuafuaina o tupe faaalu sa tele se galuega sa faatino ina ia mafai ona fetuunai e matagaluega vaega tupe ina ia ave le faamuamua i atinae oloo manaomia tele le faatinoina ia ogatasi ai ma le taiala o le atinae o Samoa mo le tausaga 2012 i le 2016.
Ua ave le faamuamua o le tala autu o le tupe i aoaoga lea o le a faaasafua i ai le vaegatupe e 50 tesimale 4 miliona ua aofia ai le vaegatupe e lima miliona o loo tufatufa i tausaga taitasi i aoga tumaoti, ma aoga a ekalesioa faapea aoga mo manaoga faapitoa.
O le matagaluega o le soifua maloloina, ua iai se faaopoopoga e lua miliona i ana tupe fuafuaina faaalu lea ua siitia ile 71.6 miliona ma o se siitaga e tusa ma le 11 pasene ua sili ai le tausaga faaletupe o loo iai nei nai lo le tausaga faaletupe talu ai.
O le atinae o faatoaga ua fuafua i ai le vaegatupe e 12.8 miliona ua aofia ai ma se vaegatupe e tusa ma le 329 afe mo le faaauauina o le polokalame o le uunaia o le toe totoina o le koko, popo ma le kofe, ae 300 afe mo le fuafuaaina o faaaliga a le au faifaatoaga.
I le itu i atinae tetele e 3 tesimale tasi miliona ua siitia ai tupe faaalu mo galuega e pei o le eletise, o auala ma ala laupapa. O fesootaiga faatekonolosi, o tagata tafafao, atinae o pisinisi, Tulafono ma faamasinoga faapea fesuiaiga o le tau ma le siosiomaga o nisi ia o vaega ua ave i ai le faamuamua a le Malo i le tala autu o le tupe.
