O le latō i le ea ma le toesea ai o le Ekalesia ona o fonotaga i le masina o Tesema, lenei ua toe taliu manuia mai, e maualuga ai pea le viiga ma le faamanū i le Atua ona ua iu manuia taualumaga uma o le fonotaga a le Ekalesia aoao mai lena 4 tausaga ua tuanai.
O le tulaga e sili ona faafiafiaina ai le aumalaga i le Setete nei o Kuiniselani, ona o le tele o nisi o aiga e alaala uma i le aai sa tetele ai lologa peitai e taunuu mai e leai ma se fale o faatamaia. O se tulaga lelei lea i le taunuu manuia mai e leai se mea e faapopolevaleina ai se tasi.
Sa solosolo lelei vaega ma polokalame uma a matagaluega taitasi mai lava i le amataga o le fonotaga e oo atu i le faaiuga e pei ona faatinoina ai pese faaleagaga, pese faaleaganuu, tala faaleagaga, tauvaga savali ma le tele o tapenaga sa faatinoina a o iai i Samoa.
I le mae‘a ai la o lea fono tele sa usuia i le faaiuga o le 2010, sa toe fesuiai ai ma tofi masani a le ekalesia aoao i le lalolagi. O tofiga la lenei a le Ekalesia Aoao (World Division) o le 2011 seia toe usuia le isi fono tele lea o le a faia i Amerika i le isi 4 tausaga.
Taitai Matagaluega a Niu Sila i Matu – Pr Willie Papu, o le taitai aoao foi lea o le ekalesia i le lalolagi atoa. Failautusi – Pr Iafeta Masepa‘u, o ia sa avea ma taitai matagaluega a Samoa lea o le siitia mai i Niu Sila. O le Teutupe – Pr Sigalu Vaotuua. Taitai Autalavou – Pr Su‘emalo Pa‘u‘u. Taitai Sosaiete Fesoasoani – Tiana Papu.
Taitai Matagaluega taitasi – Uosigitone – Pr Afereti, Kalefonia – Pr Ata Tanuvasa. Portland – Pr Vaasili Talimao. Hawaii – Pr Sanelivi. Kuiniselani – Pr Lagolago Levae. Niu Sa Uelese – Pr Kitiona Su‘a. Vitoria – Pr Ropati Lesa. Perth – Pr Levi Liva. Niu Sila i Matu – Pr Willie Papu. Niu Sila i Saute – Pr Iosua Vaotuua. Tutuila – Pr Meki Fesola‘i lea sa galulue i Kalaisetete. Samoa – Pr Tupou Te‘o (Upolu ma Savaii).
O le Aso Sapati la ua tuanai atu nei o le uluai faatasiga lea a le Matagaluega a Kuiniselani ma le au faamuli i sauniga masani, sa lagiina ai lava e le vaega e lei malaga viiga o le Atua ma nisi polokalame ma le taitaiina o le sauniga a le autalavou i le afiafi.
O lona Aso Sa na sosoo ai sa usuia ai le fonotaga masani a le aufaigaluega faifeau ma toeaiina lea na faia ai se faatali e ala i ni teutusi e le susuga ia Pr Johnny ma se vaega o le matagaluega sa lē mafai ona pa‘au atu ona o galuega ma tuatuagia
O loo tumau pea le matagaluega a Kuiniselani e leai se faafeagaiga o siitia i se isi atunuu. E toaono faafeagaiga o galulue i Ekalesia e 8, o nisi e tai 2 Ekalesia tausi Pr Lagolago ma Puataunofo Levae (Darra & Bellbird Park – Taitai Matagaluega QLD). Pr Togamau & Ianeta Tuia (Ekalesia Kingswood). Pr Faamalologa ma Tamara Fuesaina (Ipswich) Pr Johnny ma Fitulua Siofele (Algester & Southside). Pr Alesana ma Ane Tuiletufuga (Inala). r Ioane ma Judith Maiava (Cairns)
Ua faamoemoe nei ole 2014 pe a tusa ai ma le finagalo pa’ia ole Atua o le a toe usuia ai le isi fono tele i Amerika.
O le mamalu ole galuega ona le lagolagosua a faafeagaiga malolo manumalo ia
Pr Telefoni ma Sina Pone, Pr Vaalele ma Tua Te‘o faapea nai faletua malolo
manumalo ia Matagi Kitiona Sione, Ulata Chritchon ma le malosi o talosaga a
tamā ma tinā matutua.
O loo manuia ma lelei le fesootaiga i ekalesia e 2 a le Aso Fitu Tutoatasi ma
le ekalesia tele, le Aso Fitu Koneferenisi i Kuiniselani, o loo maua le
galulue ma le feoeoeai o le aufaigaluega paia a le Atua faapea tagata
lotu lautele.O le itu lea e viia ai pea lo tatou Atua e pei ona fetalai Iesu
“Ia outou fealofani”, o le ‘auga lea o ‘aute a o tapena ai le soifua ma le ola
faaleagaga o le tagata lava ia i le afio mai o Iesu le Faaola.
