Ua iai le talitonuga o saofai poo faanofonofo ma le faafotualii na faia i Si‘ufaga Falelatai i le vaiaso tonu o le a faaiu le tausaga tuai 2009, ua faamauina e sili ona toatele ni tagata ua faasuafaina ai i se suafa matai e tasi.
E toa fitusefulufa (74) suli ma feoi o le aiga potopoto i le suafa Lealaitagomoa e aofia ai itupa e lua o alii ma tamaitai, matutua, ma le au talavou na tusi aao i ai le aiga potopoto ua tatau ma onomea ona latou umia le suafa maualuga o le aiga.
Na aofia ai ma se tasi o tama fanau a Samoa ua lauiloa i lana taleni o le musika, le susuga Felise Mikaele ua suafa foi i le Asuao o Siumu.
Na faatumulia le maota o le aiga i Si‘ufaga i le toatele o suli o le suafa na malaga mai atunuu i fafo faapea suli o loo i Samoa ona o le faafotualii i le suafa Lealaitagomoa.
“E le o se suafa avane ai ua outou seei ai, ae o se suafa taua o lo tatou aiga ma le nuu”, o upu ia a le tofa i le Tootooalii na tasi moemoe i ai le sivaloa ma le faatau paia na te faia se upu mo le nofoai ai o nisi o le aiga i le suafa.
Sa taua foi o se suafa e tautuaina le aiga, le nuu ma le lotu ma o le fautuaga foi na momoli manino ia i latou ua seei i le suafa Lealaitagomoa, ia tautuana le suafa o le aiga ma le nuu ia aua nei tauvalea.
Faaalia e se tasi o le aiga (musu e faailoa lona suafa) e ui i nofo sa faia i le suafa o le aiga i auga tupulaga ua mavae e faasino i o latou matua ua fai i lagi le folauga, ae o le taimi muamua lea ua toatele ai nisi ua filifilia e nonofo i le suafa o le aiga.
“Ua tasi moemoe i ai lo matou aiga potopoto aua e maua ai le nofo lelei o suli ma feoi o le suafa aemaise ia silasila mai le nuu ma le itumalo e leai se mea o faaletonu ai le aiga i matai o loo tausia”, o le finagalo lea o le tina matua sa talanoa ma le sui o le nusipepa.
Na faaalia e le susuga Lealaitagomoa Asuao Felise Mikaele, na tusiaao loa lona aiga ia te ia, e leai se isi lagona na oo ane ua na o le faafetai, ona ua manatu atu le aiga ia te ia aemaise o loo naunau e fia tautua i lona aiga i Si‘ufaga Falelatai, ma o le a liliu nei e o si ona aiga ma tautua lelei e pei o tu ma aga ma matai o le atunuu i soo se mea.
O le molimau a le sui o le nusipepa, ua laina tutusa aiga uma o Samoa i tapenaga o ni nofo fou, aua ua le toe sasaluina ni taumafa e pei o aso ua mavae.
O nei aso ua iai suiga e pei ona faaaoga tupe ma Ie tetele e faatino ai faaaloaloga uma.
Ua faigofie ai foi tapenaga a aiga ma vave ai ona faagasolo le polokalame o le aso ma vave ai foi ona taape le toatele e auai i ni saofai.