Faafetai le lagolago, malo le faaeaea i au tamafanau
E iai le talitonuga o le a sili atu ma le fuainumera e pei ona faamauina, le faamoemoe o le sailiga seleni a le Manu Samoa, ina ua mavae le Aso Faraile na tea nei.
O le $71,000 e pei ona faamauina e le komiti, o le aao foai lava lea sa tauaaoina i lea lava aso mai nofoaga eseese i Aukilani, sa agai ane i ai le mamalu o le atunuu mo le faamauina o foai.
O se galuega tele sa feagai ma le komiti ma nisi sa fesoasoani i ai, i le tau faamaopoopoina o foai mai kamupani, ekalesia ma tagata taitoatasi. O le Radio Samoa e pei ona silafia sa faatautaia uma ai fesootaiga i luga o le ea faatasi ai nofoaga sa faaogatotonu i ai laulau mo le tusia o suafa ma foai tupe.
Sa faalauiloa foi i lea lava aso, le numera o le tusitupe a le Manu Samoa Supporters, mo i latou sa manaomia e tuusa’o i ai a latou fesoasoani, ona o le faigata o auala ma feoaiga.
E lē gata i lea, ae iai foi nisi o auala sa faatinoina ai sailiga seleni, e pei o siva ma le lesitalaina o suafa o tagata taitoatasi ma kamupani.
E oo mai i le taimi na lomia ai lipoti a le Samoa Times, e lei mae’a ona faamaopoopoina nisi o seleni ona o loo solo ane pea le alofa tulai o le mamalu o le atunuu. O le po o le Aso Gafua lea, sa toe feiloai ai le komiti ma le au lagolago mo le tuufaatasia o seleni ma faamautu vaega uma o le leitiofoni e pei ona sa faia.
Ua o faatasi le siisii pea o le aao foai o le atunuu i le lagolagoina o lana aulakapi, ma le toe sasaina e le Manu Samoa o le ‘au a le Western Force mai Ausetalia i le la fetauiga i le faaiuga o le vaiaso na tea nei.
E lua taaloga sa faia ma lea ‘au, peitai sa foi fua le faamoemoe o le Western Force ina ua lē manuia se taaloga e tasi o ia taaloga sa faatulagaina ma le Manu Samoa.
O le manumalo o le Manu Samoa i ‘ai e 37 mai sikoa e ono sa mauaina, i le na o le 10 a le Western Force i le na o le faatasi ona kolosi le laina a le Manu, o se ata manino lea ua momoli mai i le lava tapena ma le suiga o ana sauniuniga mo le taamilosaga tele o le lalolagi.
O le Aso Tofi o le vaiaso nei lava, o le a taunuu ai i laufanua o Niu Sila, le Manu Samoa, e sauni ai mo taaloga o le Ipu o le lalolagi.
Ua mae’a foi ona faataoto fuafuaga a le Manu Samoa Supporters i Niu Sila mo le faatalia o le taunuu mai o le Manu, atoa ai ma le faagasologa o taimi uma o le a iai i Niu Sila.
O le a faamautu i le faletalimalo o le Quality Hotel i Grey Lynn le ‘au mo le taunuu mai, a o le Aso Toonai o le a feiloai ai ma le komiti ma le atunuu ma faatino ai nisi o fuafuaga a le komiti sa tapenaina mo le ‘au.
O lea feiloaiga o le a faia lea i le fale o le Pasefika i Manukau, le TelstraClear.
