$70,592.30 le agalelei o Sini mo le sāvali EFKS Avao

O le avea o Avao ma nuu i Salafai e faaliliuina ai e misionare le Tusi Paia ina ua taunuu atu le Lotu i Samoa i le 1830, o le sootaga lea na lē faavaivai ai le aao mafola o Sini i le savali a le afioaga na masii mai i Sini.

O le susuga i le faafeagaiga ia Faauuga Siitia na taitaia le sauniga lotu amata i le Hall lava a le P.I.C i Lakemba. Na mae‘a ona saunoa lea o le taitai malaga le afioga i le Maopu Leota Lu II e faafeiloai ma faafetaia le afifio atu o paia ma maualuga eseese e sapaia lea faamoemoe.

O le autū ma le aano o le savali o le toe fia faaleleia lea o le malumalu o le EFKS i Avao.

O le mafuaaga lea o le faatumulia o lenei faamoemoe auā le fia fesoasoani a soo se Avao ma soo se Samoa e lagona le galuega fita na feagai ai Misionare ma sui o le Komiti o le Ekalesia ma le Afioaga i le vaitau lea o le faaliliuina o le Feagaiga Tuai ma le Feagaiga Fou i le gagana Samoa.

O lenei galuega i le tala faasolopito o Samoa ma le Tala Lelei ua afua ai nei le Faitau ma tapuai o Samoa uma  i le Afioga a le Atua talu ai le galuega mae’ae’a na feagai ma tuaa ma le aufaigaluega mai Lonetona i lea vaitau o le LMS i Samoa.

Na vaaia foi le maualuga o le aso i le auai atu o Faafeagaiga ma o latou Faletua o Ekalesia eseese i Sini nei.

Na lasi ma matagofie faasologa o peleti ma laulausiva a le aofia na faasoasoaina e le fofoga o le Aso ia Papalii Lealaiauloto Misiteveli Toomalatai.

Ina ua taualuga le aso e tusa ma le $70,592.30 Ausetalia le seleni na maua e pei ona faailoa mai i le Samoa Times e le sui o le Komiti, Rev Mose Galuvao.

E lē gata o le faamalieina o finagalo o le aumalaga le afioaga Leota Lu II,Tiatia Lino faapea le Afioga Galuvao Seko na masii mai Samoa mo le faamoemoe.

Faapea le talimalo a Avao i Sini nei ma lana Komiti, Afioga Lealaiauloto Peni, Le failotu a le Mafutaga, Rev Mose Galuvao, Failautusi ia Peti Vaalotu aemaise le teutupe ia Ana Apulu e pei ona pati taoto ai le feepo ua ae malo fai o le faiva.

E lē taumate, ua laulogo tulimanu uma o Puleono ma tumua i Pesepesega ua faapine ai lenei galuega a le Ekalesia faapea le “Savali o le Filemu” i lona taunuu atu i Sapapalii ma faaliliu ai le Tusi Paia i Avao.

“Fai mai o lalo lava o le Talie, i totonu o le Fale Vali e, Na punonou ai o Alii o le Komiti ua ta‘ua o le Papa o Misi. Pepese ia i le Pese Faafetai! Ua aulia mai e le Ekalesia i le Vaa o le Tusi Paia.”