E lei iai se ofi i le Malumalu tapuai o le Ekalesia Faapotopotoga Kerisiano i Massey, i le toatele o le Au-Faigaluega a le Atua mai soo se Fatafaitaulaga, aemaise ai o aiga, uo ma uso ia Keriso, sa taupati ane e fia auai, molimauina, ma lagolago i le faamanatuina o le uluai Iupeli Siliva o le aulotu ma le ekalesia.
O se aso o le Viiga ma le Faamanu ia Ieova Le Silisili Ese, ona o mea tetele, ma mea lelei sa ia, ma ua ia saunia mo lana fanau e pei ona alagaina i lea taeao i le taimi o le sauniga.
E le gata i lea, ae o se aso tupito mo le galuega, aemaise ai matafale uma ma nisi o toe tagata sa iai i le uluai taimi na faatuina ai le ekalesia, ae faapea foi le mamalu ia i latou o loo galulue punouai ai pea seia oo mai i le Aso Toonai, aso 30 o Iuni 2012.
O se aso e lau aso, o ni taimi foi e lau taimi, ona o le soifuaga nei ma le ola, e puupuu ma saasaa, e puleesea e pei ona silafia. Ua na o le Tamā i le Lagi, na te silafia le fua o o tatou aso o totoe. Ae o le aulia ma le faataunuuina o le faamoemoe o le ekalesia, ua moni ai le upu o le Tusi, ‘O le laau o le soifua lava lea’. O le loloto ma le tamaoaiga o le Atua, e leai se isi na te suesueina.
Ae peitai e ui lava o se aso o le fiafia, olioli, ma alaga o le Viiga, ona o le aulia o le aso sa tuupoina ma le faapitoa, ae avea foi o se aso sa toe faafoi ai finagalo faavauvau ma saafiafiga o le loto mafatia, e manatua ai tamā ma tina, talavou, o alo ma fanau a le ekalesia, ua fai i lagi le tuligasia, ma ua tofafa mai i Tia, ona o le valaau paia a le Atua.
Sa manatua foi i latou i le taimi o le sauniga, ina ua fifilemu ai le faapotopotoga i sina taimi puupuu e faailoa ai le faaaloalo ma le manatuaina o i latou uma.
O le susuga lava i le Faafeagaiga o le ekalesia EFKS i Massey, Rev Aliinuu Apisaloma, sa taitai i le sauniga faafetai sa faamanatuina ai le luasefululima (25) tausaga, poo le Iupeli Siliva o le aulotu.
O ia lava sa saunoa i se saunoaga ‘anoa ma le agaga o le viiga, i le na o le sefululima (15) minute. O ia lava foi sa tolaulauina le tala atoa o le galuega mai lona faatoa faavaeina.
O le ekalesia tuufaatasi a Tokelau, Tuvalu ma Samoa i PIC Grey-Lynn sa peseina le isi Viiga o le Atua, a o le Perepereane Samoa mai St Lukes i Aukilani lava, sa saunia le tasi pese i le taimi o le sauniga.
E silia i le luasefulu (20) auauna a le Atua ma o latou Faletua mai ekalesia eseese e pei o le PIC, EFKS, EFKAS, AOG, New Vison, Worship Centre, LMS Toefuataina, sa auai ma molimauina le faamoemoe o le ekalesia i Massey.
O le mae‘a ai o le Sauniga faapitoa, ona agai lea i le hall a le ekalesia PIC i Ranui, mo le faamae‘a ai o nisi o fuafuaga, atoa ai ma le taumafataga.
O se vaaiga maoae foi sa molimauina, ina ua faagasolo siva a aiga taitasi o le aulotu, peitai na matuā lē taofia foi le aao solo ane ma le agalelei o le toatele e lafo ma tauaao ni foai tupe, ina ua osofia i le agaga o le fiafia ma le loto faafetai.
E ta le fa (4) i le afiafi faatoa faia le taumafataga, ona o le toatele o Faifeau ma aulotu, o aiga ma uo, sa faatoai mulimuli ane a latou siva ma meaalofa tupe, e ese mai i le polokalame sa faatulagaina.
E oo mai i le taimi na lomia ai le lipoti a le Samoa Times, na faamaonia mai e le susuga i le Faafeagaiga e tusa ma le $68,000 se vaega tupe ua mafai ona faitauina ma faamaopoopoina, peitai e lei mae‘a ona faia nisi o faitauga mulimuli i le Faletupe.
Tala o le galuega mai lona amataina
O le aso 7 o Iulai i le tausaga e 1985, na amata ma faavaeina ai le EFKS i Massey mai aiga e na o le toaiva (9). Ae o le aso 4 o Aukuso i le tausaga lava lea e 1985, na faatuina aloaia ai. I lea vaitaimi o le toeaina o le Matagaluega, Rev Siaosi Ieriko.
O le susuga i le alii Aoao Fesoasoani ia Sala Pope Sua ma le Faletua ia Taialofa, sa filifilia e tausia le galuega i lona faavaeina, ma sa faaopoopoina foi le aofai o matafale i le sefulufa (14).
O le aso 9 o Setema 1985, na tonu ai se finagalo o le aulotu mo le sailia o se Faifeau.
O le aso 25 o Novema o le tausaga lava lena, na tasi ai le tofa ma le moe, ma filifilia ai le susuga ia Rev Aliinuu Liavaa Apisaloma FS, e fai ma Faifeau o le aulotu, ma sa faamaonia e le Toeaina ia Tone Tuai.
I le aso 25 o Iuni i le tausaga e 1986, na osia ai le Feagaiga a le aulotu ma le latou Faifeau fou e pei ona tasi i ai le filifiliga.
O galuega fuafua mamao ma poloketi a le aulotu i totonu o vaitaimi faatulagaina
Atinaeina o le galuega, Fanua (1986-1991)
O le fuafuaga muamua, o le fia faatauina lea o se fanua, mo le faamoemoe e fia fausia ai se Malumalu tapuai.
O le aso 6 Iulai 1986, na faia ai le uluai lafoga o se sailiga seleni mo le fanua, faatasi ai ma le agalelei o nisi o le auuso kerisiano mai Ekalesia PIC, Metotisi, Katoliko, EFKAS, AOG, ma isi, faapea le mamalu o le Matagaluega ma Pulega taitasi. E silia ma le $20,000 na maua i le uluai sailiga tupe.
O lea foi vaitaimi, na maua ai le fanua ae sa talia se tiposi. O le tupe na maua, na faatea ai loa le tiposi, o le tau o le fanua e pei ona manaomia, e tusa ma le $105,000, ae lata i le tolu eka lona tele i Massey lava.
Na sainia le maliliega, poo se feagaiga mo le ono tausaga (6), e totogi ai le mokesi o le fanua, peitai na vave ma faapuupuuina mai le ono i le 4 tausaga, ina ua lelei tele ona totogi ona peimeni faavaitaimi sa faatulagaina.
Malumalu, Satauro o le Alofa Tunoa
(1991-1996)
Ina ua motu a ma mae‘a le tau o le fanua, ona amata saili loa lea mo le tau o le Falesa. E lei malolo sailiga seleni sa faagasolo pea, mai le 1990 seia oo ia Aukuso i le 1993, na maua ai se vaega tupe e tusa ma le $355,000. Ina ua ausia lea tupe, ona finagalo loa lea ua tatau ona fausia loa se Malumalu Tapuai.
O le aso 25 o Iuni i le 1994, na faaulufale ma faapaia ai loa le galuega tele o le Viiga o le Atua. Ua faaigoaina o le Satauro o le Alofa Tunoa, e faamanatu ai le alofa o le Atua, i le soifua tautua ma le galulue o lana fanau.
Aoga Faataitai, Faamasani Aoga Amata
(1996-2001)
O le faamoemoe maualuga, ia taumafai se atinae mo se Aoga Amata mo alo ma fanau. O se aoga e le gata mo mātua ma fanau a le aulotu, ae ia fesoasoani atu ai foi mo nisi o manaomia le aoaoina o fanau laiti. E aofia ai Day Care mo pepe ma fanau laiti, e mo le 2 tausaga le matutua, seia oo lava i le lima tausaga.
Ina ia faalauteleina le aoaoina o fanau i le gagana Samoa, tu ma aga faaaloalo, ae sili ai le olaga faaleagaga ina ia aua ne‘i galo le Atua e pei ona aoaoina ai i le tatalo, pese ma tusifaitau faasamoa ma le faaperetania. Sa faaigoaina foi le Aoga Amata, o le Faamasani Aoga Amata, ona o le agaga e faamasani ma faasauni atu ai alo ma fanau mo le ulufale atu i vasega matutua ma isi aoga.
Polokalame mo Malua (1986-2006)
O se polokalame sa amata mai i le faatoa faavaeina o le lotu, o le taumafai lea ina ia maua ni sui poo taulaga tagata o le ekalesia, mo le Kolisi Faafaifeau i Malua. O lea foi fuafuaga sa le na o sui o le aulotu, ae sa tatala foi le avanoa mo soo se isi lava e fia ofoina lona soifua e avea ai ma Faifeau, poo faletua foi o Faifeau o soo se ekalesia.
Sa manuia lea taumafaiga, ma e toatele nisi sa faaiuina ma le manuia, ma o loo galulue nei i Ekalesia e pei o le Metotisi, EFKS, EFKAS, ma isi.
E le gata o le susuga lava ia Rev Apisaloma sa faatautaia le aoga e saunia ai i latou, ae sa faaavanoaina foi le Falesa, ma le hall o le aulotu, e oo lava i le tausiga ma talosaga molia sa talosia ai i latou ma le faamoemoe. O ia galuega lelei uma, sa ofoina o se tautua a le EFKS i Massey mo le galuega a le Atua.
Tausiga o le Pulega ma le Matagaluega
(2000-20012)
O se vaega o nei tausaga e tele sa avea ai lenei aulotu e fai ma taulealea matua, e fai ma vae ma lima i ai le Pulega i Waitakere, aemaise le paia o le Matagaluega Tele i Aukilani, a o tauaveina e lo latou matua, Rev Aliinuu Apisaloma le tulaga tofi o le Failautusi i le Pulega ma le Matagaluega.
Toe Faalauteleina mo le Galuega (2006-2012)
O le naunautaiga o Rev Apisaloma, e fia saili pea ma taumafai ina ia iloa nisi aoaoga a le Tusi Paia, sa mafua ai ona toe agai ma toe aoaoina. Sa matuā lagolagoina e le aulotu lea manaoga, ma sa matuā fesoasoani foi i le tele o mea sa manaomia mo le aoga.
E le gata i lea, ae sa maua ai foi ma le avanoa e asiasi ai i Ieruslema Fou ma le Nuu Paia, sa vaaitino ai i laufanua ma nofoaga sa femaliuai ma galue ai le Faaola.
O le tausaga na tea nei, sa faaiu manuia ai lea taumafaiga. Sa le faagaloina le nofo tatalo a le ekalesia i Massey, i soo se faamoemoe sa faatinoina. O lea masani o loo faatinoina pea i Aso Sa taitasi, i totonu o le galuega a le Aufaipese, Autalavou, Aoga Aso Sa, Aoga Tusi Paia, ma Mafutaga Tatalo. O galuega o le Mafutaga a Tamā, ma le Mafutaga a Tina o le aulotu.
Suafa o Faifeau ma Faletua sa fesoasoani i ai le Ekalesia i Massey, ua avea nei ma galulue i le Galuega Faa-Faifeau
Tama Fanau a le Ekalesia Massey
1. Lance Tautiepa FS
2. Simona Perefoti FS
3. Isaako Otineru AM
4. Petaia Tuifao FS
5. Iakopo Pese FS
6. Motuga Matagi FS
7. Osa Nanai FS
8. Aleki Leauanae FS
9. Konelio Tali FS
Faletua
1. Matautu Sopoaga
2. Autalaga Lupematasila
3. Rachel Mulitalo
4. Malama Taaseu
Mai isi Aulotu
1. Afa Vaeila FS
2. Tavita Matamu FS
3. Niuetasi Auapaau FS
4. Paul Grey FT
5. Samani Sila FS
6. Otto Tumanu FS
7. Neti Seluka FS
8. Alofa Ale FS
Suafa o i latou ua maliliu. Sui o le Ekalesia.
1. Eileen Isabel Apisaloma
2. Sala Pope Sua
3. Taialofa Sua
4. Tuivaiti Fetaiai Tuivaiti
5. Kaloline Tuivaiti
6. Fanuatanu
7. Pule Tuialii
8. Samuelu Fereti
9. Avamua Ah Lam
10. Muaau Faamoe
11. Palasi Faamoe
12. Sua Soatau Fosi Umutaua
13. Faasavalu Iona Lauagiagi
14. Poutalimati Tuigamala
15. Nanai Timani Leauanae
16. Leofi Nanai
17. Liueni Nanai
18. Arasi Faumuina
19. Tea Aofia Alagalua
20. Maletina Valaautulai
21. Bob Tali
22. Tanupo Lio
23. To‘i Apulu
24. David Saemo
25. Etene Ah Lam
26. Vasati Lafolafo
27. Aleki Wright
Faafetai faapitoa
O se avanoa lelei foi lenei e pei ona saunoa i ai le Susuga i le Faafeagaiga Rev Aliinuu Liavaa Apisaloma ma le Faletua, Rev Marie Ropeti, faapea le Fofoga o le Ekalesia, Laumata Peni Tuigamala, ma le mamalu i Tamalii, Failauga, Faletua ma Tausi, Saoao, Aumaga seia oo lava i fanau, e momoli atu ai se faafetai lē lava, ae tau ia ina faitau ane ai le tali faaaloalo i le mamalu i Valaaulia, Aiga, Uo, ma Aumea Mamame, aemaise lava le Au-Uso Kerisiano.
O Taitai o Ekalesia, o Toeaiina, Faifeau ma o latou Faletua, o Aoao mai Fatafaitaulaga e fia. Ae faapea foi le mamalu i Tupu ma Tamalii, o Ponaoo ma Tulatoa, ma le loaloa i le mamalu o Samoa na potopoto, sa auai ma tali mai, ma sa molimauina foi le faamoemoe o lenei Ekalesia vaivai.
Faamalo, Faafetai tele i le alofa ma le agalelei. Faafetai foi i lou auai mai, na maualuga ma mamalu ai le aso ma le faamoemoe.
O lou aao mafola foi e ala i seleni ma tupe, ma le tele o isi vaega sa foai ma ofoina, ia taui atu e le Atua, auā o Ia lava o loo faulai ai le tamaoaiga, o Ia foi e ona manuia, na te toe liligi ma faatumu ai le mea ua gaogao ona o le alofa i le Atua ma lona finagalo.
Ua lagona le mafanafana ona o lo outou mafuta ma le faatasi mai i le aso sa atofaina. E leitioa moni le tala a le Tusi Paia e faapea, Aua foi ne‘i tuua lo outou faapotopoto faatasi ma le fefaamafanafanai, ae ia fusia i le loto e tasi ma le agaga e tasi. Aua foi nei taitasi ma vaavaai ifo le tagata i ana lava mea, a ia vaavaai i isi ma le alofa.
O le a le galo oe i la matou tatalo. Ia faamanuia le Atua ia te outou uma. Aua ne‘i galo, o Upu a le Faaola, E faapei ona outou faia i se aupito ititi, o Au lava lea ua outou faia i ai.
Ia tumau le manuia ma le silisili ese o le Atua i outou luga, ma ia saga faamaupuepueina pea lona Viiga, i mea lelei ma galuega tatou te faia, a ia tumau le faatauvaa o le tagata, nei ma aso uma lava e faavavau.
Faia i le finagalo malie, mai le ta‘ele o agaga, Rev Aliinuu Liavaa Apisaloma, ma le Faletua Rev Marie Ropeti, faapea le Ekalesia EFKS i Massey, Aukilani i Sisifo.
