O le lotonuu moni e faaali ma faatino i le foai ma le loto malie atoa ai ma le talisapaia fiafia o soo se faamoemoe, ma manaoga e tagi mai ai afioaga ma aiga i Samoa.
E toaitiiti lava matafale sa faatinoina se sailiga seleni a le afioaga o Fatausi i Safotulafai i le motu tele i Savaii, peitai sa tulai mai o se taumafaiga sa faamanuiaina ma ausia se fuainumera tele e tusa ma le $65,000.
O Aukilani i Sisifo sa faataunuuina ai le Po Siva a le afioaga, ma sa molimauina le toatele foi o le mamalu o le atunuu, i uo ma paaga aemaise ai paolo ma gafa maualuluga sa taupati ane e fia fesoasoani i le faamoemoe.
E ui i lea, a o matafale lava e na o le valu o le afioaga sa tapenaina le sailiga seleni, sa palasi i ai le mamafa ma le faatinoga o mea uma sa faatino ai.
E moni ai le upu e masani ai le atunuu, ‘E laititi ae maini’, pe a maitau i le fofoga taumafa mo le au valaaulia, faapea ai foi tapenaga uma sa vaaia i lea aso.
O le faamoemoe o le sailiga seleni, o le fia fesoasoani lea i le toe fausia o le Mauga o le Atua i totonu lava o le afioaga i Samoa. O le malumalu e tapuai ai lana fanau i le ekalesia EFKS, e faapea se faamatalaga o loo ua faagasolo le galuega i le taimi nei.
O le ala lea sa lē nofonofo ai tamalii ma tamafanau a le afioaga i Aukilani, ae taumafai loa e faatino le alofa ma le lotonuu moni auā le atinaeina o le tino mai o le galuega a le Atua i laufanua ma eleele o le afioaga.
O le afioaga o Fatausi i le paia i aiga, i le Afio o alii o le Aufono ma Leilua, o Tuilagi ma le Aiga Sa Tuilagī, faapea le mamalu o le Fuaiala. Ae tainane foi le tapuaiga i le paia ia Safotulafai, i le afio o Leilua ma le Toalima, afifio Sa Alalatoā ma Alo o Malietoa, Tuilagi ma Namulauulu.
Sa matuā faatumulia le hall a Leuatea, le Ekalesia PIC a Ranui i le toatele o le au valaaulia, ma i latou sa molimauina le faamoemoe i le Aso Toonai na tea nei.
O faiga masani lava foi o aso faapea, sa amata lava foi i le sauniga lotu, ona faasolo ai lea o le tusia o meaalofa, sosoo ai ma ipu a aiga ma matafale o le mafutaga.
O le mae‘a o le taumafataga ma le taligasua, ona toe faasolo ai lea o siva Samoa ma faafiafiaga seia oo lava ina mae‘a.
Na sosoo ai ma le tufatufaina o se meaalofa, e ala i le malo ma le toga a le atunuu, e tali faaaloalo atu ai i le paia ma le mamalu sa auai ma fesoasoani ane i le faamoemoe o le afioaga.
O ietoga tetele sa aumai mai Samoa, faapea foi tapenaga a le mafutaga i Aukilani, sa fai ma afu o Samoa potopoto i lea aso.
O le susuga ia Legaoi Opeta, o le taitaifono o le mafutaga i Niu Sila, sa fai ma fofoga o lea aso.
Sa molimauina foi le see loa o le sa o le taitaifono i le faasoasoaina ma le faatautaia o le polokalame ma le faamoemoe, ona o le lava tapena ma le sauniuni mo aso faapea, auā ua masani ai le atunuu e pei o isi foi upu masani e fai o Patatua, a o tua foi o Patatua.
O le afioga ia Tauiliili Iese, o se tasi o tamalii, ae o se tamā foi o le afioaga na malaga mai Samoa ona o se faalavelave faaleaiga, peitai ua fetaui lona iai i Niu Sila ma le faamoemoe, sa faaaloalo i ai na te taualugaina e ala i sana sausaunoaga faa-Samoa.
O nisi o le laulau poo le komiti i Niu Sila e aofia ai Legaoi Lene o se tamā matua o loo faatama i ai le mafutaga.
O Legaoi Opeta o le taitaifono, o Tofilau Loimata o le failautusi, ma le susuga ia Lisi Leaumoana o le teuoloa poo le teutupe.
Saunoa Legaoi Opeta e faapea, o se taimi o muamua o le talanoa ai le mafutaga, ma se‘i feiloai atu foi i le faafeagaiga a le afioaga i Samoa, ona mautinoa lea pe o le a malaga
ni sui o le mafutaga i Niu Sila e momoli le seleni, poo le a faaaogā auala faaonaponei e faaoo ai le gapatia ma le foai e pei ona taulimaina nei.
