O le lu‘i a le Malo e ala atu i le alii Palemia, le susuga Tuilaepa Lupesoliai Sailele Malielegaoi, na fofogaina i lana saunoaga faapitoa o le faaafe tele a le Malo sa faia i Apia i le taunuu ai o le au taitoafitu a le Manu Samoa.
O le saunoaga a le Alii Palemia e tatau i le Kamupani malosi o telefoni feaveai le Digicel ona o latou faaluaina soo se foai a le au fai telefoni feaveai ia ua talosaga i ai le kamupani telefoni ina ia foai atu le $1 mai ia latou telefoni uma mo le ‘au a le Manu Samoa taitoafitu.
O le mae‘a la o le vaiaso na tea nei lea na ao ai le foai lenei na tauaao aloaia atu ai loa e le Digicel e ala atu ia Pepe Christian Fruean le alii Pule, le meaalofa a lea kamupani.
“O le tupe na aoina mai i le $1 na text atu e le ‘au faitelefoni feaveai na maua ai le tinoitupe e $7,000, o nisi o le atunuu na momoli sa‘o mai lava i le matou ofisa i Vaimea a latou meaalofa tupe lea na maua ai le silia i le $8,000 ma o le tupe na ao e le aufaigaluega lava ia a le Digicel na faaatoa ai loa le $22,000,” o se faaaliga lea a Pepe Christian Fruean.
O le lu‘i la a le Palemia ina ia mafai ona faaluaina e le Digicel soo se tupe e ao mai i le atunuu. O le tali a le Digicel ua faaopoopo ai le isi $40,00 mo le Manu Samoa.
E leai lava ni tala se tele o le feiloaiga i le faaiuga o le vaiaso se‘i vaganā le faafetai o le ‘Au Siamupini o le Taitoafitu a le Manu Samoa.
O le foai lenei a le Digicel ua faaopoopo atu i le foai e $280,000 a le Malo lea na tauaao atu i le amataga o le vaiaso i sui o le autaitoafitu faapea ai le pulega o le ‘au i le alii faiaoga aemaise le taitai malaga.
E ta‘i $19,400 (tala) le tupe a le tama taalo na maua ma na iai foi se seleni na tauaao atu e le Faaputugatupe a Samoa i atunuu mamao le SIFA mo le aulakapi lava ia.
O lea la ua faaopoopo i ai le tai $4,000 a le tama taalo mai i le tupe lenei a le Digicel ma ua latalata ai i le ta‘i $30,000 tala a le tama ua maua mai i le aao mafola o le atunuu.
O loo faaauau foi faaafe a kamupani eseese mo le ‘au ma na talosagaina foi e le Alii Palemia le aiga o pisinisi eseese i Samoa e faasoa ane se seleni e maua auā lava le tali atu ai ma le faafetai i taumafaiga a nei alo o Samoa ua tuu ai Samoa i le faafanua faavaomalo i faagatama o le lakapi ona o le faaeaea ua o latou faia.
O loo taatia atu foi i le Malo se talosaga ua faato‘ai mai e le Kapeteni o le ‘au a le atunuu, le alii o Lolo Lui mo ni fasi fanua mo tama taaalo.
“E leaga le tupe e uma lava ona toe tufa e tama i aiga, nuu ma uo ae o le manaia o ni nai fanua ona o le a avea ma pine faamau o lenei taumafaiga tele aemaise e tali atu ai foi i le tautiga ma le tauiviga na alo atu i ai fanau a le atunuu,” o sana faamatalaga lea ina ua faalauiloa lo latou manaoga.
O loo tālia la poo le ā se tali a le Malo i lea talosaga. E lē o mailoa foi le aso e masii atu ai le Manu Samoa Taitoafitu i Amerika Samoa i se valaaulia aloaia mai le afioga i le Kovana o le teritori, le Afioga Togiola Tulafono ma lana faigamalo ina ia faaafe foi Amerika Samoa i alo o le atunuu ua manatu Amerika Samoa ua faaeaea uma i le atu Samoa ina ua manumalo mai i le Taamilosaga Taitoafitu Faavaomalo e pei ona mae‘a nei.
