O le taulealea lea ua maua e leoleo mai alii e toalua na osofaia le faleoloa o se Saina i Vailoa Faleata. O le isi vaaiga lena i le video o se tasi o alii Saina na lavea ona lima i se agaese ina ua osofai e se tasi o le au gaoi ma talepe fale

O le taulealea lea ua maua e leoleo mai alii e toalua na osofaia le faleoloa o se Saina i Vailoa Faleata. O le isi vaaiga lena i le video o se tasi o alii Saina na lavea ona lima i se agaese ina ua osofai e se tasi o le au gaoi ma talepe fale

“Ua lamatia tele pisinisi faleoloa o nai Saina”

Ua lua faleoloa o tagata faipisinisi mai Saina ua osofai e ni alii talavou o le atunuu. Manatua le faleoloa i Falelauniu i ni vaiaso e lei mamao tele atu, lea na alu atu se taavale laititi na malaga ai ni alii talavou se toalua, ona alu lea o le isi taulealea i totonu tu’i foliga o le fafine Saina ae fao tupe sa i le masini e teu ai tupe.

O le Aso Tofi na tea nei o se faleoloa i Vailoa Faleata o se isi foi Saina.

O le 3 i le vaveao na osofai ai. E toalua foi ni alii talavou na faia ma ua maua le toatasi ona o le manino o foliga o lea alii na maua i ata video o loo maua ai vaega uma o le faleoloa.

E onosefulu afe se tupe na toesea ae o loo nenefu i le faamatalaga a leoleo pe o le tupe lea na toe maua ina ua pueina le alii talavou ua taofia, ona o le Aso Tofi lava lea na maua ai ma le isi pagota o le toalua o pagota na sosola ma le falepuipui i Tafaigata ua atoa ai le masina. Fai mai leoleo e sefulu afe tala na toe maua ae leiloa poo le seleni lea na maua i le pagota o Aniseko Vailei e faapea molimau na maua i Tapatapao.

O leoleo o le falepuipui na latou maua. O le isi pagota o Pati Chong Nee o loo sailia pea, ma e lei maua foi le isi taulealea e toalua ai i laua na osofai le faleoloa i Vailoa Faleata.

Lamatia pisinisi a tagata Saina

A fua atu i le sosola i tua o pagota o Aniseko ma Pati o laua na osofaia le faleoloa o se Saina i Moamoa ona o loo iloa lelei foliga i mea pueata video o lea faleoloa. Na sosoo ma le osofaia o le fale e nonofo ai se faia’oga o le lala o le Iunivesite a le Pasefika i Alafua o loo i Moamoa, ma o loo masalomia ai foi pagota peitai e lei maua tonu se faamatalaga mai leoleo poo pagota poo nisi tagata.

E iai le talitonuga o le tele o manatu faitio o nisi i luga o fesootaiga televavave le social media faasaga i faipisinisi Saina i Samoa ua faaoloataua ai lagona o nisi tagata ma o lea ua aliali mai i fafo fua o ia lagona ilitata i Saina. O se galuega faifaatasi a tagata uma le puipui lelei o ia tagata faipisinisi.

O lagona ia o nisi ua faaleo ona e lē o se tala lelei mo Samoa le lamatia o le saogalemu o nisi tagata mai fafo o loo faia a latou pisinisi i le atunuu o loo maua ai galuega a tagata, ma fesoasoani foi i le tamaoaiga o Samoa.

O osofaiga na tutupu mai o loo manunu’a ai nisi o tagata Saina e pei foi o se tamaitai ma se alii Saina na aafia i ni manu’aga i le osofaiga o le faleoloa i Vailoa. Ua fautuaina e le Komesina o Leoleo le afioga Fuiavailili Egon Keil le aufaipisinisi i le tatau ona teu o a latou tupe i faletupe ina ia malu puipuia ai.

O le $60 afe e leo manino mai leoleo pe o le seleni lea na gaoia mai le faleoloa i Vailoa Faleata, o se tupe tele.