O se tasi lea o talitonuga e laitiiti i totonu o Samoa ae ua iai lona lava malumalu tele i Tiapapata. Ua iai lana aoga faataitai ma ua tele lava foi ina fesootai ma isi ekalesia lotu i Samoa i sauniga a le Malo. E lē o i le li‘o o lotu Kerisiano i le Fono a Ekalesia Soofaatasi ae ua atoa le 60 o tausaga talu ona faavae i totonu o le atunuu.
O le faamanatuga la o lea laasaga tele i le talafaasolopito o le Talitonuga Bahai i Samoa na valaaulia ai le Alii Palemia ma sui o le Kapeneta, sui o le Palemene atoa ai nisi o kamupani tuma‘oti i totonu o Samoa i se faatasiga na faia e faamanatu ai lenei tausaga tāua mo le Talitonuga.
O le faamalo a le taitai o le Malo ona o le umi ona faamautu lenei talitonuga i Samoa e leai lava ni vevesi a o ni faafitauli o tulai mai ai ma o le taulai a le Bahai ina ia faalautele le filemu i totonu o aiga, nuu ma ekalesia, o ni taitaiga ua vaaia le lelei faatino i totonu lava o lenei talitonuga i tagatānuu o Samoa o loo faapea ona fai ma sui.
O le faamalosi a le alii Palemia ina ia tumau le filemu ma le unai o aoaoga e pei ona vaaia i galuega e lenei talitonuga ma ia faamalosia le ola filemu ma le fiafia o ona tupulaga.
O se tamaitai Ausetalia na malaga mai i Samoa i le vaa o le Matua i le tausaga e 1954 na faapea ona aumaia lenei talitonuga i Samoa ma o se tasi lenei o tapuaiga na lotu ai le afioga mamalu i le Ao o le Malo ua maliu, Susuga Malietoa Tanumafili II.
