Ua taunuu nei i le Faamasinoga Maualuga i Samoa se tagi ua ta‘ua o se su (lawsuit) faasaga i le Matagaluega o le Soifua Maloloina o loo tuuaia ai le Minisita o le Matagaluega, Afioga Gatoloaifa‘ana Amataga Alesana Gidlow, le Faatonu Sili Aoao le faletua o Palanitina Tupuimatagi Toelupe, ma le auaunaga faalesoifua maloloina le National Health Service i le faatamala, na mafua ai ona maliu se tina ma‘itaga ma lana pepe e lei fanau mai i le maota gasegase i Tuasivi Savaii.
O le mataupu lenei e mafua i le siigama‘i a le tina ma‘itaga ma lona aiga na afea ai le falemai i Tuasivi i le masina o Fepuari o le tausaga nei, lea na aafia ai i se tulaga tigaina a o faatiga, ma faatalitali ai le taunuu atu o se fomai mai le maota gasegase i Motootua na te faia se taotoga e mafai ai ona ola le tina ma lana pepe fou. Peitai o le aso na taunuu ai i le falemai seia oo ina faatetele le tiga o le ma‘itaga i le aso na sosoo ai, na lē mafai ai ona faia se togafiti e faasaoina ai le pepe ma le tina ma iu ina maliliu uma ai.
E $6 miliona tasi le selau afe (6.1million) le aofaiga o se vaegatupe ua tatalo le itu tagi poo le toalua ma le aiga o le tina ma lana pepe ua fano soifua, e totogi atu e le matagaluega ona o lo latou faatamala ma le lē lelei ona faatino o o latou tiute ma le auaunaga na mafua ai le faalavelave. O le tulai mai o lea faalavelave na lagona ai le leo o le lē fiafia mai le toatele o le atunuu lea lava na faaleo ai foi lagona faanoanoa o nisi o faipule o le Palemene.
O le autū foi lea o le faatauanau a le sui faipule o Levaopolo Talatonu i le Malo ina ia ave le faamuamua e faaleleia ai le soifua maloloina o Savaii ia taofia ai le toe tutupu o nisi faalavelave faapea i le lumanai. Sa faia se suesuega faalotoifale a le matagaluega o le soifua maloloina i le mafuaaga o le maliliu uma o le tina ma lana pepe.
E lei faailoaina lava le taunuuga o lea suesuega ae o loo iai molimau e lei faamaonia, ua ta‘ua ai ua faamalolo se tasi o tausi soifua poo se tausimai sa galue i Tuasivi e mafua mai i lea mataupu.
O se taimi o le masina nei o Setema o le a fofogaina ai i le Faamasinoga Maualuga i Mulinuu le su e $6.1 miliona mo lona valaauga muamua (first mention) ona iloa ai lea o se tulaga ua iai tapenaga a itu e lua o loo aafia i le faamasinoga.
O se loia tumaoti o loo tauaveina le tagi a le aiga o le tina ua maliu faatasi ai ma lana pepe tama, ae o le Loia Sili a le Malo o le a tauaveina le itu a le Matagaluega o le Soifua Maloloina.
