E leai lava se fesoasoani tuusa‘o a le Malo mo aiga na aafia meatotino e pei o fale i le afā o Eveni, ma ua faamaonia e le taitai o le Malo lea tulaga.
Ae o fuafuaga a le Malo mo le faatinoina o fesoasoani mo tagata na aafia faapea atinae tau pisinisi na afaina ua tuuina atu se vaegatupe e tusa ma le $5miliona i le Faalapotopotoga o Fale le Housing Corporation e agai i ai tagata na faaleagaina o latou fale ma pisinisi e nonō pe aitalafu mai ai ni seleni mo le toe faaleleia o meatotino sa faaleagaina.
O aiaiga o lea tupe ua ave i le pulega o le faalapotopotoga o fale a Samoa, ia lē silia ma le $30,000 le aofaiga o tupe e mafai ona aitalafu, ma nonogatupe uma e itiiti le tului poo le interest.
O le lima miliona lea o se vaega tupe e tusa ma le 24 miliona ua faasafua atu e le Malo i le faalapotopotoga o fale ma le Faletupe o atinae e agai i ai tagata ma pisinisi na aafia e faia ai ni nonogatupe.
Faaalia e se sui o le Housing Corporation i se lipoti a se tasi o nusipepa e tuuaunoa le tului pe leai se interest o nonogatupe uma i totonu o le 12 masina, ae e tolu pasene le tului pe a tuanai le tausaga e tasi.
O aiga e manaomia nisi e faamaonia nonogatupe aemaise o tagata o tauaiga e vavalalata sootaga e na o le 15 afe le seleni e mafai ona agavaa i ai ae o i latou e iai fasi fanua e faamaonia ai se aitalafu e agavaa ona talosaga mo se $30,000.
O le Aso Tofi ua mavae na sainia ai se maliega i le va o le minisita o Tupe ma le kovana o le faletupe tutotonu o Samoa, faapea faauluuluga o le faalapotopotoga o fale ma le faletupe o atinae mo le faamautuina o le fesoasoani lenei.
“O se faamāmā avega lea ua aumai e le Malo mo matou, ae e tatau foi ona fai fuafua a matou nonogatupe i le malosi tau seleni e fua i tupe maua mai fanau o loo faigaluega ma aiga i fafo”. O le finagalo lea o se tasi o tamalii na matuā faaleagaina uma ana meatotino e pei o fale mataavale i le malosi o tafega ma lologa.
O le mau a lea tamalii o Samoa ma lona Malo e tau atinae e utiuti le faasoa a le Malo, ae faafetai e ui o nonogatupe ua tatala mai ai le lima miliona e toe totogi, ae e itiiti lava le tului pe a fua i tului a faletupe faapisinisi poo Commercial banks.
O le faletupe o atinae ma le Housing Corporation o ni meatotino a le Malo o Samoa. Ua amata nei ona tatala faitotoa o ia auaunaga a le Malo i le atunuu mo le tuuina atu o talosaga ma faagaioia ona faia ai lea o faaiuga mulimuli.
