O le igoa o le pagota o Moli Maposua – sa faamaonia i le amataga o le tausaga lana solitulafono o le totōina lea o fualaau faasāina o le mariuana.
Sa tuli lona faasalaga e pei ona to mai e le Faamasinoga Maualuga i Tafaigata peitai na aveese e Leoleo ina ia taofia ai i Tuasivi i le isi toese lea a le Malo ona o le manatu a tuufaatasi ma nisi ua tuuaia foi i nei soligatulafono, e leai se toe fuata‘ina e maua ai ae na o le faateteleina ai o faiga e faatau atu ma totō pea le laau faasāina lenei.
O le ave la o lenei alii i Tafaigata ua aumai ai ni faaseā a nisi o loo vaaia pea lenei alii e lē o taofia i le Toese ae ua faapea ona nonofo faatasi lava ma leoleo o loo vaaia Tuasivi i le ofisa o Leoleo i lea itu o Samoa.
E lē gata i lea o faaseā nei ua faaoo mai i Ofisa Faasalalau ma nusipepa ua ta‘ua ai le nonofo o lenei pagota ma lona faletua i le Ofisa lava lenei. Ua faapea foi ona teuina le isi potu o le Ofisa e momoe ai lenei alii ma lona faletua. Faaalia e Lilomaiava Fou Taioalo ina ua tāpā sona finagalo i lenei mataupu, e matuā lē talia e le Ofisa o Leoleo nei ituaiga faiga. O le pagota lava ia na ia ta‘ua na mafua ona faasala ina ia alu ese ai ma faiga masani o le olaga ae ia tuli le taui o solitulafono ua feagai ma nei sui o le atunuu. Na faaali ai lava ma le faanoanoa o le alii Komesina o Leoleo pe afai e faamaonia ia faaseā.
Na ia ta‘ua na asiasi atu foi i Savaii i vaitaimi lava ia na tulai mai ai faaseā nei ma afai e faamaonia nei tuuaiga na ta‘ua e Lilomaiava, o lona uiga na fai faananā lava nei uiga ma ua o ese tagata nei i le taimi sa iai i lana asiasiga lea i Tuasivi.
Faaalia e le Komesina o Leoleo o le maua ai o nei faitioga i luga o le ea ma luga o le pepa, ua ia faatonuina ai loa nisi o le Matagaluega lava ia o Leoleo ma Falepuipui ina ia o latou agai sa‘o loa i Tuasivi mo se lipoti.
E lei faalauiloa mai ia lipoti ae o le Komesina Lagolago o Leoleo, le Afioga Leaupepe Fatu Pula, ae o le vaiaso na tea nei sa agai atu ai lea taitai leoleo i le Ofisa o i Tuasivi.
Ua iai foi le maliega a le Komesina o Leoleo, o a lava faaiuga o le a aumai i nei lipoti, “o le a faapena foi ona tali atu i ai le Matagaluega i le faaiuga poo le faasalaga talafeagai mo leoleo o loo faia lea tulaga lē fetaui….E matuā sā lava i le tulafono ona faia ni tulaga faapea ma e tuuaia lava leoleo sa tiute i le faataga o nei faiga, pe afai ae faamaonia mai”.
E tulai mai nei faitioga o loo faagasolo foi suesuega a le ofisa lava ia o Leoleo e faatatau i nisi foi faitioga e faatatau i le faaitu‘au o nisi o Leoleo o Tafaigata i pagota o loo taofia ai i lea nofoaga.
O pagota lava na faia ia faitioga ma faalauiloa ai ina ia mafai ona oo atu i le Pulega a le Matagaluega a latou faaseā. O nisi o faiga a Leoleo ua tatala ai le avanoa e feoai solo ai pagota, o nisi ia o taui e maua e i latou ua taofia i le tulafono ae o loo ave tupe ma taumafa i Leoleo i le tele o taimi.
Ua folafola foi le Komesina, o ai lava e faamaonia ua faia nei uiga ma aafia ai pagota ma lē taofia ai i le falepuipui, o le a faatea loa.
