O le malaga taamilo a “Le Nifoloa” sa faagasolo i Ausetalia nei, e pei ona tuua ai aiga ona o le faalauiloaina lava o le taleni i atunuu i fafo ma Ausetalia, lea o le a sauni malaga atu e toe foi i fanua i le Aso Lulu o le vaiaso nei.
E tele nauā le tupulaga ma soo se tasi e fiafia i musika a le susuga ia Maaelopa Polu Paletaoga. Ua laasia nei le CD numera ono lea ua mae‘a ona sau i tua, peitai e tiga ona utiuti le taimi a o faasavali le koniseti, ae sa maua lava le taimi e pueina ai ma le CD Vol 7 lea ua faamoemoe e lē o toe mamao lava sina taimi ona sau lea i tua.
O le fale puepese ua lauiloa foi i Melepone a le Mt Fao Band sa galulue malosi e tuufaatasi lea CD faatasi ai ma le faasavaliina o le koniseti sa auau faatasi lava ma lenei faaili.
O le po la o le Aso Toonai na tea nei sa tuufaatasia ai aiga, uo faapea ē masani i se fiafia mulimuli e faatofa mai ai le alii pese a o lei malaga atu i aiga ua leva ona valavala.
Saunoa le susuga ia Maaelopa Polu Paletaoga, e ui lava ina taumafai le fili e faaleaga lana taleni peitai o le malosi ai lea o le alualu i luma o lona malosi e toe fatufatu ai nisi lagona fou.
O le agaga fiafia, ona ua tino mai lona faamoemoe pe a tuufaatasia le aofaiga o ana koniseti faasavali uma na ia tauaaoina ai se seleni e tusa ma le $54,000 tala Ausetalia.
O le aai o Kuiniselani e pito maualuga se foai sa faamaopoopoina ai pe a fua atu i le po e tasi e tusa ma le $16,000, peitai o le tele lava o seleni sa tauaaoina e le mamalu o Samoa i Melepone ona e tolu po sa faafiafia ai. E lē itiiti ai lona agaga fia faafetai e pei ona tuuina mai e faaleoina e le nusipepa faavaomalo a le Samoa Times, e molimoli atu ai se faafetai tele i le paia ma le mamalu o Samoa i lenei atunuu ona o le alofa foai faapea soo se tasi e fiafia i ana musika.
O le Atua e soloi ona manuia e tele e toe faatutumu mea ua faagaogaoina ona “Le Nifoloa”. Sa matagofie le koniseti mulimuli a “Le Nifoloa” sa faataunuuina i Melepone, o se faamavaega lea i uo ma aiga faapea paaga, a o lei taliu atu i Samoa mo Tutuila.
O loo fuafua se malaga taamilo i Niu Sila i le tausaga fou ona toe taliu mai lea i le faamanatuina o le tutoatasi a Samoa i Brisbane nei i le 2011. Sa momoli foi le faafetai tele i le faaili a le mauga o Fao i Melepone ona o le tele o taimi e vaavaalua ai ua tini ai lau o le faamoemoe.
Faafetai! Faafetai! Faafetai tele Samoa!
