E to‘a 53 ni alii talavou o le atunuu ua sauni e galulue i luga o vaa tetele i Europa sa faamavae atu i ai mātua ma o latou aiga i se sauniga i le vaiaso talu ai.
Sa saunoa timai ai foi le taitai o le Malo, le afioga i le alii Palemia ia i latou, ina ia tautuana le amio pulea ma faapelepele i le igoa lelei o Samoa a o iai i atunuu i fafo mo galuega.
O ia alii talavou o le a galulue i luga o vaa i se kamupani i Italia ma o le a fetaui ai ma isi alo ma fanau a le atunuu o loo galulue ai i le taimi nei.
O le tāua i le Malo o nei avanoa ona o loo maua ai le fesoasoani tau tupe mo aiga, ae fesoasoani ai foi i le tamaoaiga o le atunuu. Ua iai nisi o alii vaa mai Samoa sa maua ia avanoa ua lē toe maua ia galuega ona o faafitauli sa aafia ai, aemaise lava o le faafitauli o le tagofia o le ava malosi ma iu ai ina lavelavea i isi ituaiga o amio lē taupulea.
I le saunoaga a le taitai o le Malo na ia faailoa ai i alii vaa poo seila o le a malaga, o le ma‘i oti o le AIDS a maua ai le tagata o latou, na o le taunuu mai lava i le atunuu faatalitali oti loa, ma e tatau ai ona aloalo ese ma amioga e saofia ai i le faia o nisi uiga matagā ae tatala ai le avanoa o le AIDS.
Na faailoa ai foi e le Palemia se alii vaa na galue i se kamupani vaa i Europa ae na faamalolo ona o ni amioga na ia faia i se fale kalapu sa tafao ai, lea sa ia taumafai ai e faasiva se tamaitai o le faaili ma faia ai ai nisi uiga, ae o loo iai le uo tama a le tamaitai i le faaili.
Faaalia e le Palemia ana lē toatele nisi na vaovaoina le uo tama a le teine, e faasola lea alii seila mai Samoa ona sa aliali ane ai se agaese puupuu na tauau e faatino ai se faalavelave ogaoga ma aafia ai le ola o lea taulealea mai le atunuu.
O tagata uma e maua lea galuega na faaalia e le Palemia e lē toe maua se avanoa i soo se galuega i luga o vaa. O le tasi lea o galuega o loo unaia malosi e le Malo e maua ai galuega i luga o vaa tetele la‘uoloa ma meli la‘upasese i atunuu i fafo ona e lelei totogi.
O nisi o tama fanau a le atunuu ua loa tausaga o galulue ai, ua molimauina le taunuu lelei o a latou galuega ona ua siitia ai le tulaga o o latou aiga i le itu i le tamaoaiga.
