Ua savalia nei i le ono vaiaso talu ona tuanai le mafuie ma le galulolo matautia sa afatia ai lo tatou atunuu o Samoa, ma ua faamauina ai foi lea faalavelave i talafaasolopito o Samoa talu mai le foafoaga.
E ui i afa malolosi o Ofa ma Valelia sa afataia ai foi le atunuu i ni tausaga ua mavae, ma sa faamauina ai foi o nisi ia o faalavelave tetele i le talafaasolopito i lea foi vaitaimi, ae peitai e tulaga ese foi le mafuie, ma le galulolo latou ia. Sa maitauina foi le anoanoai o atunuu sa fesoasoani atu i le tulaga o tupe, lavalava, aemaise lava foi i taumafa.
O le sasaa atu o le mau faamanuiaga mai auala eseese, ae foliga mai e “Faiva ese Lopepe” e pei o upu e masani ai le au faitofā a le atunuu, pe a faatusatusa atu i le tulai mai o le galulolo i lenei tausaga.
O le aao mafola ma le agalelei, o le alofa tulai ma le fesoasoani atu o atunuu o le lalolagi ia Samoa, aemaise lava o lenei atunuu o Niu Sila, e le o faaitiitia ma tuumamaina, e oo mai lava i lenei taimi. O le kamupani a le Progressive Enterprises i Favona, e latou e ona le Countdown, Woolworth ma le Foodtown. O le nofoaga tutotonu a lea foi kamupani o loo i Favona Road i Magele, o loo numera tasi ai lava foi tagata Samoa, ma isi tagataanuu o loo galulue ai, ma o nisi lava foi ua aao taumatau i ai, ma faatuatuaina e le pulega o le kamupani, ma ua siitia ai foi le tulaga i galuega.
O le feiloai atu foi o le Samoa Times i le pulega, ma nisi foi o tamafanau a le atunuu o loo faauluulu i ai galuega a le kamupani, sa faailoa mai ai le agaga fia fesoasoani foi mo le tulaga e pei ona sa mafatia ai le atunuu i le mafuie ma le galulolo. Sa taua e le alii Pule Sili, Russell Morre, o le tautua faatasi ai ma le toatele o tagata Samoa i totonu o le kamupani, o le tasi lea o mafuaaga o le malilie, ma le auai faatasi o le pulega, e foai lea seleni, e le gata o se tali e faafoi atu ai le agaga faafetai i tagata galulue, ae faailoa atu ai foi le amanaiaina o i latou sa aafia o latou aiga i le faalavelave.
O le $50,000 sa tuuina ane ma ua iai nei foi i lima o le faalapotopotoga a le Koluse Mumu, o le foai lava lea mai le kamupani. Peitai sa faataunuuina foi isi a latou sailiga tupe a tagata faigaluega uma mai sifi e tolu i le luasefulufa itula i le aso. Ua faamaonia mai foi la e le Pule Sili o le kamupani Russell Morre, e tusa ma le $4,000 se vaega tupe sa tuuina e tagata uma i le pakete sa faasolo i matagaluega uma a le kamupani. O lea vaega tupe o le a toe faaopoopo atu i le siaki sa tuuina ane muamua.
O le agaga faafetai foi sa tali atu ai le tatou nusipepa i le agalelei tele o lenei foi kamupani mo mafatiaga o si o tatou atunuu.