(Masiofo Filifilia Tamasese, Ofisa o Peace Corps, 30 Mati 2011)
Ou te fia momoli atu le faafetai faapitoa i le valaaulia o a‘u e avea ma faa-Ao o le faamanatuga o le 50 tausaga talu ona faavae Peace Corps a Amelika ma le avanoa e fai ai sina upu puupuu.
O nei sauniga faamanatu o loo faia i le lalolagi atoa i atunuu uma ua galulue ai Peace Corps; ma ua faamanatu ai le faasoa atu o le latou tomai, ma le latou pulunaunau e lagolago le atina‘e ma lalaga le pitolaau a atunuu eseese o le lalolagi.
E tele ni alii ma tamaitai Peace Corps ua matou galulue i Samoa nei i le galuega faafaiaoga ma totonu o le Ofisa o Aoga. E lē gata o ni tagata e maoa‘e le agavaa, a ua avea lava i latou o ni uo māfana e oo mai lava i le asō.
O le molimau tumau o galuega a Peace Corps, ona ua latou faasoa mai i galuega ma totonu o lotoifale o aiga o atunuu sa o latou tautua ai, le agalelei ma le maelega o tagata Amelika.
O le asō ua tatou aufaatasi ma le lalolagi e sula le sao ma le galuega a Peace Corps mo le lelei, le atina‘e, le filemu o le lalolagi; ma le tofa maotua ma le alualumamao o taitai o le malo ma le atunuu o Amelika.
Ia faamanuia mai le Atua i lenei faamoemoe.
