Se mea ina a lelei o se Taitai e filigā ma mataala e lē faagaloina foi e lana lafu mamoe. O le tau gaga ifo o le la i lona nofoaga mau i le tauafiafi auaoa o le Aso Toonai na sei mavae atu nei, na tauaofia ai Ekalesia a le Hosana i Brisbane faatasi ai ma susuga i faafeagaiga uma mai Niu Sila, Sini, Melepone ma isi vaega ua tupu ai ma ola le galuega, ona o le fia molimauina o le aso faapitoa o le susuga i le taitai, Ps Josua Asafo Avia.
Na faatumulia ai le pitonuu o Annerly e lata i le fatu o le taulaga o Brisbane, i le paia i le auvalaaulia, aiga ma uo. O se aso na molimauina le tumu saisai o le hall sa faaaogāina.
O ia o se lupe faalele a le alalafaga o Salelologa. O le susuga ia Oso Sam Lavata‘i sa fai ma fofoga o le aso i lea afiafi. O le susuga ia Tapuala Taumaloto Faalelei sa fai ma sui o le Ekalesia e faia se upu faafetai ma molimolia se aao foai o le Ekalesia, i le matagofie o le vaaiga ma ona teuteuga i lea afiafi.
O faamanuiaga ma alofaaga mai ou aiga ma uo faapea susuga i Faafeagaiga uma o le Ekalesia Hosana, ae silisili ai alofaaga mai lou faletua o Helen ma le nofoaalo i Brisbane.
