E mataina se vaaiga matagofie felanulanuai fetaliai e lē gata i totonu o le laumua i Ueligitone a o le taupati mai o Auauna totofi o le galuega a le Atua mai atunuu i fafo faapea ma Niu Sila nei i le uluai aso faapitoa o le faamanatuina o le 50 tausaga o le EFKS i Aotearoa i le faatinoina lea o le ‘Ava ua masani ai Samoa.
O sui o le malo Niu Sila aemaise lava sa faapitoa i le Ofisa o Mataupu tau Pasefika i Aotearoa.
O se sauniga tāua i le talafaasolopito o le Ekalesia EFKS e lē gata i le nofoaga i Samoa ae faapea foi i totonu o Aotearoa. Matagofie le saofaiga i le Au Toeaiina, susuga i faafeagaiga totofi ae faapea foi faafeagaiga malolo manumalo o loo soifua pea.
Se mea ina a lelei o le auaufaatasi ma le pulupululima faatasi i le uluai aso i le ‘ava o le feiloaiga atoa ai ma le tauaaoina o le tusi faapitoa o le talafaasolopito o le EFKS i Aotearoa.
Sa mua lava mea i matautu sa, le faafetai e sulaina le faamaoni o le alofa taumulimuli o le Atua ma lona faamaoni i le tatalo na saunia e Rev Tavita Taule‘alo le toeaina Faatonu.
O tautalaga faapitoa o aso faapea aemaise ai lava le tusi faapitoa o le talafaasolopito o le EFKS i Aotearoa na saunoa i ai Rev Elder Popo Su‘a, faatasi ai ma le tauaaoina faamealofa o le Ie o le malo na saunoa i ai le Faifeau Toeaina ia Rev Lucky Slade.
O saunoaga ma tautalaga faapitoa i le saofaiga i toeaiina faapea foi tamalii Samoa ma le Pasefika i upufai o le malo a Niu Sila.
E ui ina puupuu le sauniga faapitoa o lea aoauli i le Laumua i Ueligitone ae na matuā iloga ma faapine faamauina lea uluai aso o le faamanatuina o le Iupeli auro EFKS i Aotearoa.
O palapalamalo i le taumafataga faapitoa o lea aoauli ua atili matagofie ai lea aso.
O se tasi vaega tāua tele i lenei Iupeli auro o le avanoa lea e mafuta ai auauna a le Atua e ala i le taaloga o le tagapolo sa faataunuuina lea i Karaisetete i le aso 8 o Tesema lava.
O se vaiaso o tapenaga saunia lelei ma le atoatoa ua talafeauga foi lava ma le tulaga o le tau e ui ina vaaia pea le toulu o nai timu māmā aemaise ai le agaigai atu ina faalogoina le tau mafanafana.
O le sauniga faapitoa i le taeao o le Aso Lulu 12 o Tesema i le nofoaga na muai faavaeina ai le uluai Ekalesia EFKS i Niu Sila i Grey Lynn, na matuā leai se ofi i lea taeao o se taeao o le lotu faafetai a‘e i le Atua i tamā ma Auauna a le Atua na latou asaina le galuega faavae o le amataina o tapuaiga EFKS i totonu o Aotearoa.
O se tasi o avanoa sili ona tāua o le taimi faapitoa e mafuta atili ai Faifeau e ala i le taaloga tapolo ma faaauau ai lava ona maualuga ai le agaga faafetai i ē sa muai galulue i le talalelei i Aotearoa ua lagomau mai i Ti‘asa, ma e manatua pea i o latou faiva faaauauna o le talalelei ia Iesu Keriso.
O taaloga o le tasi lea o tapenaga e lei faagaloina i le taaloga o le kirikiti, le volipolo na alausu i ai i le taeao po o le Aso Faraile 14 o Tesema, ma o nei taaloga e oo mai lava i nei aso o loo vaaia pea le faatinoga i totonu o polokalame faaautalavou a lenei lava Ekalesia i tausaga taitasi, e lei tuueseina ai le matagofie naua o faafiafiaga felanulanuai mai sao o pulega eseese faatasi ai ma nisi o aufaafiafia na valaauliaina faapitoa i lea aso.
Sa tofu sao uma le toatele i faafiafiaga mai lava i le tupulaga talavou e oo atu lava i tino matutua o le Ekalesia mai nofoaga eseese, o le mafutaga a tina faapea tamā a o le sao tele o autalavou. Sa aofia ai foi i nei tapenaga aoaoga faatalanoaga fetufa‘iga ma le faaaliga o manatu i mataupu faasailiiliga i avanoa o fetufaaiga ma fefaasoaiga i mataupu. O fonotaga faakoneferenisi i fefaasoa‘iga o manatu taitasi i le tele o mataupu tāua, posiva ma faafiafiaga mai matagaluega eseese.
Sa faaiuina i le sauniga lotu tuufaatasi na matuai faatumulia ai le TelstraClear aemaise ai le tipina o le keke faapitoa o le 50 tausaga EFKS i Aotearoa, ma faaauauina ai pea i se taumafataga saunia lelei, ae faateleina ai pea le viiga o le Atua i ia aso o le faamanatuina o le Iupeli Auro o le EFKS i Aotearoa.
E faamanuia atu ai foi i le Ekalesia aoao i lea faamoemoe tapena lelei ma ia faaauauina ai pea le fiafia e tapuai i le Atua soifua.
