“O le suafa Sula, o le suafa Taupou o le afioaga i Fausaga, o le suafa foi e faasino ia Toleafoa ma Laumutiamanu, o le faalagiga foi lea o le nuu atoa.
E leai la se isi e nofo ai, ma e lei iai lava se isi o lenei nuu sa nofo ai, pe na fuafua foi e nofo i le suafa talu mai lenei augatupulaga, aemaise foi o augatamā ma tuaa ua fai atu o le nuu o Fausaga.
O le mea moni lava e soifua mai lava tupuaga o lenei aiga ma le afioaga, o faalupe lava ma tauave i faalupega le Sula, ae lei mafai lava ona faaee ma nofo ai se tasi.
O le ala lea e manumanu ai ina ua tulai mai le tamā matua lea ua ia taumafai e fai se mea fou i totonu o le afioaga.
O le upu moni lava o le suafa Taupou o lenei aiga, ma le afioaga i Fausaga, e lē faatauina i ni tupe, e tusa lava foi poo ā auro ma ario o mea e taugata o le olaga nei, e lē mafai lava ona seetia ai pe faatauina ai foi le suafa Sula.”
O le saunoaga manino lava lea a le afioga ia Toleafoa Tautulu Robeck, o lē o loo faasa‘osa‘o ma tauavea le aiga, atoa ai ma le afioaga i le taimi nei.
E talitonu ma le maumaututu le afioga ia Toleafoa Tautulu Robeck, ua seetia ma tosina le tamā matua ia Toleafoa Mago Tuaena i le $50,000 a le tamaitai na malaga atu i fafo, ua mafua ai ona faigofie ona matala ia sega le tofa a lea itupaepae o le aiga, ma soona tuulafoai ai le suafa Taupou o le aiga ma le afioaga, i se tasi e matuā lē talafeagai lava.
Na faamaonia mai e Toleafoa Tautulu i se feiloaiga ma le Samoa Times i le faaiuga o le vaiaso talu ai, ina o iai i Aukilani mo nisi o fuafuaga faaleaiga na malaga mai ai.
O le nofo na fai e le isi itupaepae o le aiga, e lē o taliaina ma e lē o aloaia foi e le nuu ona e iai mafuaaga ogaoga ma le lē tatau e faavae ai le finagalo o le afioaga.
O le ala foi lea na solitu ai le nuu atoa e lei usufaaaloalo ina ua tāpā mo le nofo na fai faamalosi.
Na faamanino foi e Toleafoa Tautulu, ua mae‘a lava ona fofogaina le ofisa o le Lesitala i Apia e ala i se tusi sa tuuina i ai e taofia ai le faatinoina o le saofai sa faia i le suafa Sula.
O le tusi lava foi lea e tasi sa tuuina atu i le afioga ia Tuaena, ina ia faateletelegese lona finagalo, ma taofiofi mamalu se‘i maua se feiloaiga pe a taliu atu i fanua lē o loo tauavea le aiga, aemaise ai o le isi lea itupaepae o loo nonofo ai i totonu o le afioaga.
Peitai sa lē logosaia ma tatala le tofa faatamalii a le toeaina matua, ma ua fai pito tasi ai lava lana pule, ma faaauau ai le nofo ona ua silasila i le tupe na faailoa i ai e le tamaitai ua nofo faamalosi nei i le suafa.
E lē aloaia, e lē o talia foi e le nuu le saofai ma le nofo sa faia i le suafa Sula
Na faamaonia mai e Toleafoa Tautulu e lē o talia e lona nuu le nofo sa faia. O le lē taliaina o le lē aloaia foi lea i totonu o le nuu ma lana pulega faamatai o loo faatautaia ai le afioaga. Ta‘ua e Toleafoa na solitu le nuu e lei usu faaaloalo e pei o faiga masani.
E lei sainia foi e le pulenuu se pepa faamaonia o le matai na fai e tusa ai ma le galuega a le malo o loo tauavea e le tofi.
O le isi lea mafuaaga faavae e fai ma faamaoniga o le lē talia e le nuu o le nofo sa faia. O le ā lava foi la se faamatalaga ua ta‘ua ai e le itu sa faia le nofo e faapea ua faatea le pulenuu, ona o le lē sainia o le pepa matai, ia e pule lava latou, a o le mea moni e lei silafia e le nuu lea tulaga.
O loo faaauau pea lava tofiga ma le galuega a le alii pulenuu, auā e lē mafai foi ona latou faia lea tulaga. E tusa lava pe toafia na sainia se pepa e teena ai le tofi pulenuu, e lē mafai ona aveesea ai le tofi sa filifilia e le afioaga atoa.
O itu tāua nei o loo ta‘ua i le tusi taofi sa tuuina i le ofisa i Apia, ma o le finagalo autasi foi lea o le afioaga, sa tatau ai ona lē faataunuuina le nofo, ma e lē o aloaia foi e oo mai i le taimi nei:
• E lei iai se feiloaiga i itupaepae e lua o le aiga e uiga i le nofo
• E lē talia e le nuu lē na nofo
• E lē faatauina i ni tupe le suafa Taupou o le afioaga
• O se faiga soli faavae le faiga o le nofo ona e iai mafuaaga
• E lē o le ulu o le suafa Toleafoa lea na fuafuaina ma foaia le nofo.
Na saunoa foi Toleafoa Tautulu ma ta‘ua ai le tulaga ua manatu māmā ai le afioga ia Tuaena i lo latou feagai ai ma le afioaga.
O le finagalo o Robeck e faapea, o le toeaina na faapogai i le nofo, e leai sana tupulaga i le saofaiga ma le faiganuu o loo iai nei.
E matua tele ma o le mafuaaga foi lea ua ia fuaao ai le nuu atoa ma tagata o loo iai. Peitai e ao foi ona fua i luma ma tua, auā e ese lava le matua i le soifua, ese le matua i le silafia ma le mautinoa lelei o le faavae, ma le nonofo ai i totonu o le afioaga.
Na toe faamanatu foi e Tautulu se tasi foi faiga matautia a le toeaina lava lenei sa fai muamua, ma aa i tui ai i le nuu.
O lona faatuina lea o se isi ekalesia fou i totonu o le afioaga e aunoa foi ma le faailoaina i le nuu.
E lē gata i lea, ae talu ai ona sa iai lava le faavae ma le sa a le nuu sa iai i le tulaga o ekalesia, peitai sa lē usitaia foi e lea tamā atua, ae sa faaaogāina pea lava lona tagata matua e soli ai le faavae o le nuu.
O le isi tulaga o lona faia lea o ana matai e lē o ni matai faavae o le nuu, ae na ia taumafai e faanonofo faatasi ma matai tu o le afioaga. E lē o se mea fou la le faavevesi mea o lenei toeaina, ae masalo o lana lea masani ma lona natura.
O le taumafai lava e aumai ma fai ni mea fou e soli ai tuutuuga ma faaiuga a le nuu.
O le faaiuga sa faia i ai, sa faatea ese ai ma le faiganuu, faatasi ai ma le lē toe taliaina lava e oo i le faavavau. Peitai ai ua galo i lea tamā lona avanoa pumoomoo na toe maua ina ua tootuli le susuga i le faafeagaiga taulagi a le afioaga, ma tagi ane ia alofa ma tatala lea faaiuga sa fai iai.
O le ala lea o le toe tafa o le tofa ma le faautautaga a le afioaga, ma toe tuuavanoa loa i ai, lea la e oo mai lava i le asō ua toe fainuu ai.
A o lea foi ua toe aapa i le isi mea matuiā ma ua faaalia ai lava le faamaualuga ma le fia pule sauā ma le soonafai, ma o le aa i tui lava lea i le nuu.
Na fesiligia foi le afioga ia Toleafoa Tautulu, pe iai nisi mafuaaga e faavae ai le finagalo o le afioaga, e uiga i le taofia pea ona faia ma nofo ai se isi i le suafa Sula. O le tali mai e faapea Ioe, e iai mafuaaga o loo taofiofi ai le nuu.
Aafiaga o le afioaga pe afai ae faaaogā le suafa Sula
E lei faia lava se nofo muamua i le suafa, o lona uiga foi a fai ae fai se nofo e foliga mai o le a suia ai foi faalupega o le nuu. E leai se isi o lenei augatupulaga e mafai ona toe suia faalupega o le afioaga sa sau ai.
Ua maliliu tamā sa latou suesueina ma sa silafia lelei i le mafuaaga o mea sa tutupu, ma mau e afua ai ona maua faalupega.
O le faalagina o Sula o le Taupou poo le Sa‘otamaitai e faasino ia Toleafoa ma Laumutiamanu. O le mea moni o Sula, o le afafine o Toleafoa e lē mafai la ona nonofo faatasi i se faiga nuu, ma toe faafesagai le tamā ma lona afafine pe a oo i fono ma faiga masani a le afioaga.
E faaeteete lava le nuu ona e lē iloa foi poo fea tonu e nofo ai Sula i totonu o le fale o matai pe afai ae faataunuu le suafa. O se suafa e foliga e faaaloalo ma aloaia i faalupega o le nuu, ae lei mafai lava ona faasuafaina ai se isi.
Aisea na lē faia ai i le taimi o tuaa ua mavae, ae faapefea la ona toe aapa e fai ua siliga i tamā matutua ua fai i lagi le folauga, e lei mafai ona latou faataunuuina.
Itupaepae e lua o le aiga Toleafoa
Tama Faasau
O le itupaepae o loo faasa‘osa‘o ai Toleafoa Tautulu Robeck e faalupe o le Tama Faasau, o loo iai lava tala mai le vavau, ma talatuu Faa-Samoa o loo silafia e le atunuu atoa, ma o faamaoniga foi ia o le umia e lea itupaepae o le malosi ma le mamalu atoa o le suafa. O le autū foi lea o le suafa Toleafoa i totonu o Fausaga.
O le itupaepae faavae foi lea o le afioaga ma o le ala taofi mamalu foi lea ona o le manumanu i meatotino a le aiga ma le afioaga. O le isi foi le tulaga e mafua ai ona lagolago malosi e le nuu ma tausisia pea faiga masani, ma faiga faavae sa soifua mai ai.
Itupaepae Soamamala
O le isi itupaepae o loo faalupe ma faaupuina o Soamamala, o le itupaepae la lea e iai le tamā matua ia Toleafoa Mago Tuaena. O ia lea na ia faia faamalosi le nofo i le suafa Sula, la lea ua vevesi ai le nuu. O ia foi lenei sa faateaina muamua mai le faiganuu e pei ona ta‘ua i luga.
E lē gata i lea, ae o loo manino foi le afioaga, O le itupaepae a le toeaina lenei, na faato‘ā aloaia ma ofi mai i totonu o le nuu i le tausaga e 1970. O le tausaga foi lea na faato‘ā amanaia ai ma faaulufale i le faiganuu a Fausaga, talu ona foafoa mai.
O loo manino foi le faaiuga a le tulafono i le nonofo ai o itupaepae e lua, i totonu o Fausaga, ma e lē feaiāa‘i foi.
O le finagalo o Toleafoa Tautulu e ao lava ina manino le au faitau, ma aua ne‘i taitaiseseina le mamalu o le atunuu, i mataupu faalotoifale a le afioaga, ma o le ala foi lea o le taumafai e fofola le ata atoa o lenei talanoaga ma le mataupu.
Aisea na faia ai e le itupaepae a Toleafoa Tautulu le nofo a le papalagi, i le suafa Toleafoa, ae lē talia le matou foi nofo
O le fesili lea a le toeaina matua ia Toleafoa Mago ma lona aiga, e tau faatusatusa i le mataupu ua va ai nei le fogavaa i itu e lua o le aiga.
O le tali mai a Tautulu e faapea, e tele lava lona eseesega o le tulaga ua toe fesiligia ai. O le ofoina o le suafa i le alii afakasi e pei ona ta‘ua, ua o se Matuupalapala sa talimasineia ai galuega tetele sa ia faia, ua lauiloa ai Samoa i le lalolagi.
O le faaeaea la a lona aiga sa mafua ai ona tuu i ai le suafa e taui atu ai ma faailoa atu ai foi le amanaia e lona nuu, ma le atunuu o Samoa, o lana fesoasoani.
O le suafa Toleafoa e pei lava foi o suafa o loo tausia le aiga ma le nuu, ae lē mafai lava ona lotea ma ofoina le suafa Sula o le aiga.
E telē lava lona eseesega, pe afai o le itu lea o loo lē manino i ai Tuaena ma lana itupaepae.
E faamalulu foi i tamalii ma failauga, aemaise le tapuaiga a le afioaga, e lē o se sagolegole o le galuega nei, peitai e ao lava ina manino ma malamalama lelei, talu ai ua mae‘a ona faitauina i lipoti sa tuuina mai Samoa i le mataupu lava lenei.
E ao ai lava foi ona faaleo ma tāpā ai se finagalo o le isi itu, aemaise ai se finagalo faaalia o lo tou afioaga.
Ua mae‘a le fono masina a le afioaga sa faia i le aso 9 o le masina nei lava ia Aukuso.
O le faaiuga sa tasi i ai le nuu i le mataupu lava e uiga i le nofo sa fai faamalosi, ua tuuina nei i ai e le nuu le avanoa mo le isi fono masina o muamua.
Ua lapataia ai lea itu o le aiga, ina ia oo atu i ai ua maua se faaiuga mautu e ala i le soloia poo le faaauau pea o le nofo sa faia, ae lē faaaogāina lava e le afioaga.
O loo tālia nei le isi fonotaga masina a le afioaga, ma mautinoa ai se faaiuga a le afioga ia Toleafoa Mago ma lana itupaepae, pe o le a faaauau pea le nofo, ae faaauau foi ona lē amanaia ma aloaia e le nuu, pe toe soloia e pei ona finagalo i ai le afioaga.
A o le fesili tele e tulai mai, afai ae toe soloia le nofo, a faapefea le seleni tele ua faaalu. Atonu o se fafagu tele foi mo aiga ma i latou o loo alaala i fafo, ina ia silasila toto‘a ma maitau ma le manino taaviliga ina ia mautinoa o se mea mautu le matai e ofoina mai, a o lei maimauina le seleni, pe o le manao o John Wayne i le tupe, ae sue e le Initia le mea e ola ai, pe a uma ona fai le matai.
