O le ta tonu o le vaeluaga o le po o le Aso Gafua, aso 3 o Ianuari na faamae‘aina ai aso faitauina o aso mālōlō o le Kerisimasi ma le Tausaga 2010/2011 i Ausetalia, ma ua tulai mai ai, ua 46 soifua ua maimau i faalavelave tau taavale i luga o auala i taimi o aso mālōlō o le Kesrisimasi ma le Tausaga Fou.
I lenei aofai lea ua numera silia ai Victoria, e 16 i latou na maliliu ai. O Kuiniselani e 12. O Northern Territory e 3.
O Western Australia e 3. O Tasmania e 1. O South Australia e 1. O New South Wales e 10.
I se lipoti mai le Ofisa o Leoleo, o nei faalavelave e mafua mai lava i le avetaavale onā, avetaavale saoasaoa ma le lē tausisia o tulafono ma saoasaoa faatulagaina.
E ui ina ua maualalo le faitau aofai o tagata maliliu a Kuiniselani i le tausaga 2010 lea ua faamauina e 247 i latou na maliliu i luga o auala i le tausaga na tea nei, e 84 ua maualalo ai nai lo le tausaga 2009.
O le tausaga mulimuli na pa‘ū maualalo ai tagata maliliu o le tausaga 1952, e 251 ē na maliliu i luga o auala, peitai o lea faato‘ā amata le 2011 ae o lea ua tulai mai ua atoa le to‘a 5 ua maliliu i le aso 4 o Ianuari, ina ua faato‘ā mae‘a le faitauga i le aso 3.
Sa matuā faafetaia e le Komesina o leoleo, Bob Atkinson, le aufaigaluega mo faalavelave faafuasei ona o le vave ona tali atu i valaau mo faalavelave sa tutupu i luga o auala tetele lea e tusa le aofai e 14,000 faalavelave tau taavale na tulai mai i vaitaimi o aso mālōlō.
E iai nisi o setete faato‘ā faamae‘aina le faitauina o ē maliliu i aso mālōlō i le aso 7 o Ianuari, peitai o le faitauina lava ia a Ausetalia atoa e mae‘a i le aso 3 o Ianuari.
