E $40,000 le aofai o le foai a le Sosaiete o le Tautua i Puapuaga o Tagata, mo le Vaega o le Faamamā Toto ma Vaega o Auaunaga Faasoifua Maloloina i Upolu ma Savaii.
O le Peresitene o le Sosaiete, le Faletua ia Faafetai Leaso Tupai na ia tauaaoina atu lea foai i le Afioga i le Minisita, Afioga Tuitama Dr Leao Talalelei Tuitama, e pei ona molimauina i lona Ofisa i le taeao o le Aso Faraile 17 Me 2013.
O le vaevaeina o lea foai a le Sosaiete e pei ona saunoa i ai le Peresitene o le Sosaiete e faapea, e $10,000 e tuuina atu i le Falemai Faamamā Toto i Savaii, ma le $20,000 mo le Falemai Faamamā Toto i Upolu.
E $5,000 e tuuina atu mo le Vaega o Auaunaga Faasoifua Maloloina i Upolu, ma le isi $5,000 mo le Auaunaga Faasoifua Maloloina i Savaii.
E na o le agaga o le faafetai na saunoa i ai le Afioga i le Minisita, ona o lea foai tāua ua tauaaoina e le Sosaiete, mo vaega o le auaunaga a le Matagaluega, auā le tautuaina o le mamalu o le atunuu.
Na saunoa Tuitama e faapea, e iai nisi o vaega o le auaunaga e ao ona siitia atili mo le vaega o le faamamā toto i Savaii, ma e talitonu o le a avea le seleni ua foai e faatino ai lea auaunaga.
E iai foi le talitonuga o le Afioga i le Minisita, atonu e iai nisi vaega o le auaunaga faasoifua maloloina e ao ona faaleleia atili, ma o le a aogā tele i ai lea seleni.
O taumafaiga uma ia a le matagaluega aemaise o le auaunaga faasoifua maloloina e tautua ai le atunuu, ina ia siitia ma lelei.
“O le auaunaga lava lenei a le Matagaluega ina ia tali atu i manaoga o le mamalu o le atunuu i vaega tau soifua maloloina ina ia lelei ma atoatoa.”
Peitai na faaalia e le Peresitene o le Sosaiete, o le a faaauau ai pea lea faiga paaga ma le Matagaluega o le Soifua Maloloina, ina ia aogā seleni e fesoasoani ai i le tautua a le matagaluega o loo ofoina atu i le mamalu o le atunuu.
E lē o se taimi muamua lea ua foai ai e le Sosaiete lea fesoasoani mo ia auaunaga.
“Talu mai le faavaeina o le Fale Faamamā toto, na amata ai foi ona faatino foai a le Sosaiete.”
O le malaga mai ai o le Laulau a le Sosaiete e pei ona faaalia, ona o soo se tausaga lava e faatasi ai mo fonotaga i Malua, o le vaitau foi lea e agai mai ai le Laulau e tuu aloaia mai le meaalofa a le Sosaiete mo le ia Vaega o le auaunaga a le Matagaluega i tausaga taitasi.
Ua faamoemoe foi le Sosaiete o le tausaga fou, o le a toe malaga mai ai foi mo lea faamoemoe lava e tasi, ina ia tumau ai pea le galulue faatasi ma le matagaluega.
O le Peresitene o le Sosaiete o le Faletua ia Faafetai Leaso Tupai o le Matagaluega a Faasaleleaga.
Sui Peresitene o le Faletua ia Terry Slade o le Matagaluega a Te Atatu i Aukilani, Failautusi o Faasasalu Alesana o le Matagaluega a Lea, Lotofaga ma Aleipata.
O le faletua ia Leafa Panapa Too o le Teutupe mai le Matagaluega a Itu o Tane.
