E molimauina le tāua tele o pesepesega o le Kerisimasi i tausaga taitasi ona e lē gata o le tāua o lea vaitaimi o le fanau mai o le Pepe o le Kerisimasi, ae ua faatāuaina faatasi ai ma tulaga o le saogalemu o tatou aiga mai aafiaga o le taumafaina o le ‘ava malosi ma sauaga ua aafia tele ai aiga.
O le tasi tāua o pesepesega ua avea foi lea ma auala ua taofia ai le toatele e mafuta ma aiga ma faafofoga i nei polokalame i le leitio nai lo le tosinagofie i tafaoga i falekalapu ma isi tulaga faafiafia e leai se manuia e maua mai ai na o fevesiaiga ma faalavelave e tulai mai ai.
I totonu o lea lua vaiaso o pesepesega ua aogā tele i mātua matutua ma i latou nofofale ua iai se polokalame latou te momolia atu le feau o le Kerisimasi. I lenei la tausaga ma tapenaga a le Ekalesia EFKS Magele i Sasa‘e na tatalaina e le autalavou na malaga mai Samoa mai le afioaga a Vaiala.
O se autalavou e toatele i le tupulaga laiti talavou mai le afioaga aemaise le susuga i le Faifeau ia Rev Lotu Uele.
Sa faatumulia le malumalu EFKS i le uluai poo pesepesega o le 13 Aso o le Kerisimasi 2012 le gata i nisi lava o le afioaga o Vaiala ae faapea le atunuu. Sa matagofie le teuina o le malumalu EFKS i Magele i moli felanulanua‘i ma le vaaiga i le fale o Manu i sona faatinoga.
O se uluai vaiaso o pesepesega matagofie mai Ekalesia sa auai, ma o loo faauauina nei i lenei vaiaso tapenaga faaiu o nisi o aufaipese lautogia e faaiu ai le toe vaiaso o lea polokalame i lenei tausaga o pesepesega.
E mautinoa i lea tausaga o le a siitia ai foi le tulaga o lea vaaia e lē gata i aufaipese lautogia ae o se isi foi vaaiga sili atu. O le Aso Faraile la o le vaiaso nei e tapunia aloaia ai le polokalame i lenei tausaga e le Autalavou EFKS a Magele i Sasa‘e lea lava o loo talimalo.
Ua faapea foi ona aulia ai ma le 50 tausaga o le EFKS i Aotearoa ma faamanatuina ai faatasi ma lenei polokalame. Talosia ia faaauauina pea lenei polokalame mo ni tausaga se tele e viia ai le Mesia.
