O le faatuatuaga na ave i le alii Pakisitana o Arshed Fareed na te pulea ma vaaia ai meatotino a le kamupani faatau taavale o le Alnima, o se vaega sili lea ona amanaia e le faamasinoga i le faia o lana faaiuga i moliaga o le gaoi a o avea ma tagata faigaluega na faamaonia faasaga i lea alii.
Faaalia e le afioga i le faamasino o Vui Clarence Nelson, e soo se tagata e ave i ai le faatuatuaga na te vaaia ai se meatotino ae tupu ai se faaletonu, e le solomuli le faamasinoga i le faia o le faaiuga fetaui ma talafeagai.
O le mafuaaga lea na ulufale ai i Samoa le alii Pakisitana i le tausaga e 2008 o le pulea o le pisinisi faatau taavale a nisi alii Pakisitana.
O le tausaga e 2009 i le masina o Iuni na osia ai se mafutaga a le ua molia ma se isi tagata o Laulu Dan Stanley ma faatu ai le pisinisi faatau taavale o le Singapore Motors.
E osi lea mafutaga o loo avea lava ma pule o le Alnima le alii o Fareed lea na ia faatino ai loa ma se gaioiga o le avatu o taavale mai lea pisinisi ma faatau i le kamupani ua la faatuina.
E oo i ni vaega o seleni a le Alnima na ia ave i le teugatupe a le Singapore Motors.
O se gaioiga sili ona le lelei i le silasila a le faamasinoga i le faia o lana faaiuga ona ua atagia ai le lē faamaoni o le ua molia aemaise o ni gaioiga faaalatua e aunoa ma le silafia e i latou e ana le Alnima Motors.
O le tau aofai o taavale e 25 na toesea a lea kamupani e $512,000 ma o se tasi o faamasinoga na muamua atu i le mataupu lava lenei o loo poloaina ai le ua faasalaina e na te toe totogi atu i le Alnima.
6 tausaga na fautuaina e loia a le itu a leoleo e faasala ai Fareed i le falepuipui ae peitai o le silasila a le faamasinoga e le talafeagai, pe a fua i ni faasalaga ua mae‘a ona faia i ni mataupu sa molia ai nisi i le solitulafono o le gaoi a o avea ma tagata faigaluega e aafia ai ni vaega tupe tetele.
E 6 tausaga na amata ai le fua a le faamasinoga ona toesea lea o isi masina ona o le faato‘ā molia o Fareed i se solitulafono a o nofo ai i Samoa atoa ai ma le tasi o itu o ia o se tagata mai fafo ma o le a aafia lana talitonuga faalelotu ona o le a nofosala i le falepuipui.
Ua totoe ai tausaga e 4 ma masina e ono ua tuli e avea ma ona faasalaga. E iai se isi mataupu sa faamasino ai le kamupani o le Singapore Motors ma le pulega o le faletalimalo o le Elava i Fugalei e mafua i le fanua o lea kamupani sa lisi ai le pisinisi faatau taavale a Fareed i Vaitele-tai.
E le o iloa le taunuuga o lea finauga ae ua le o toe faagaioia ai lea pisinisi i luga o le fanua ona o loo talia se faaiuga a le faamasinoga i le mataupu.
Ua mau paolo le alii i se tamaitai Samoa.
