Ua iai nei se iugafono a le Komiti o Feau Eseese a le Ekalesia Faapotopotoga Kerisiano i Samoa, le EFKS, e faaalu le 3 miliona tala o tupe o le ekalesia, mo aulotu ma aiga o le ekalesia sa aafia i le afā o Eveni.
E tolu miliona se vaega tupe na pasia e le Komiti o Feau Eseese i lana fonotaga i le faaiuga o le vaiaso talu ai.
O lea tupe o le a fesoasoani ai i mea na faaleagaina e pei o falesa ma maota o faafeagaiga, faapea foi aiga o le ekalesia na matuā faaleagaina a latou meatotino i le afā. O loo fuafua foi e faaalu se vaega o lenei seleni mo faleaoga o le ekalesia na faaleagaina.
O le tau atoa lava ia o meatotino na faaleagaina a le Ekalesia e tusa ma le 10 miliona; lea e aofia ai malumalu, o maota o faifeau faapea ma faleaoga. Peitai ua faaalia e le Failautusi aoao a le Ekalesia, le susuga ia Dr Iutisone Salevao, o le 3 miliona ua pasia e le Komiti o Feau Eseese, o le a taumafai e faatino ai se fesoasoani, e gafatia ona faatino ai se laveai mo aiga o le ekalesia ua mafatia.
O loo iai le fuafuaga, o malumalu ua matuā faaleagaina, o le a maua se fesoasoani tuusa‘o ae o falesa ua na o nai apa na masue i le matagi, o le a nafa lava ma aulotu e ana ia malumalu e latou te faia ni galuega mo le toe faaleleia.
E 80 afe se vaega tupe na muamua faasafua e le ekalesia ina ua mae‘a le afā, e faaoo atu ai fesoasoani mo aiga ma ekalesia na matuā afaina, ma e 3 miliona la lea ua pasia nei, e toe faaopoopo atu i lea vaega tupe.
O le fono tele la faaletausaga a le Ekalesia o le a usuia ia Me o le tausaga nei, o le a soalaupule ai foi se isi fesoasaoni e 10 afe mo aulotu na aafia nisi o a latou mea totino.
