38 Aoga faaaogāina le polokalame o le SchoolNet

E 38 le aofaiga o Aoga ua mafai ona faaaogaina le polokalame o le SchoolNet. O le vaiaso ua tuanai na faalauiloa ai le faaaogaina e le Kolisi o Uesiliana i Satupaitea o lea polokalame, ma ua atoa i ai le 38 o aoga a le Malo, Aoga Tumaoti aemaise o Kolisi ua faaaogaina lea poloketi.
O lea poloketi o loo i lalo o le vaavaaiga a le Matagaluega o Aoga, Taaloga ma Aganuu.
Na faaalia le agaga faagaeetia o le Afioga i le Ofisa Sili o Pulega, Afioga Matafeo Falanaipupu Tanielu Aiafi, ona o le solosolo lelei o le faagasologa o le poloketi.
“O le SchoolNet na amata ina ia mafai ona sailiili i ai faiaoga ma tamaiti aoga, i le sailiga o a latou tusi ma isi oa e faaaogaina mo aoaoga.”
E le gata i lea ae na taua foi e le Ofisa Sili o Pulega, o se avanoa foi e aveesea ai le faaitiitia o faiaoga e agavaa i le aoaoina o mataupu, e pei o le Gagana Faaperetania, Faasaienisi ma le Matematika.
O le poloketi o se auaunaga e aoga, e le gata o faiaoga ae faapea foi i tamaiti aoga, e suesue ai ma sailiili i vaega o aoaoga o loo fia malamalama atili ai, o le faaopoopo lea a le Afioga i le Ofisa Sili o Pulega.
O le naunautaiga lea o le Malo e pei ona saunoa Falanaipupu, ina ia maua uma e kolisi le avanoa tutusa e faaaogaina ai ituaiga poloketi faapenei.
O le poloketi o le SchoolNet, o le faitotoa lea mo faiaoga e faaaogaina ai nisi o polokalame o loo i luga, e faamataalia ai ana mataupu poo ana lesona fai.
O le vaega tonu lea e faafaigofie ai e faiaoga ona maua le avanoa e sailiili ai tusi, e sailiili atili ai i ana mataupu o loo fai.
O le SchoolNet foi, o le a mafai ai foi e le tamaititi aoga, ona faaaogaina tusi faatekonolosi ma isi tusi e faaaogaina i nisi o mataupu e moomia ai le malamalama atili.
O lea poloketi o loo faatupeina i le fesoasoani a le Faletupe o le Atu Asia.