E to‘a 37 ona sui i totonu o le Palemene. O loo tulai mai pea i le foe o le Malo o Samoa. Ua valu ai i le faigamalo o iai nei paeaiga o loo taitai lava e le Vaega faaupufai e Puipuia Aiā Tatau a Tagata (HRPP) le malo o Samoa.
O pine nei ua faamau faailoga ai le malosi ma le maopoopo o le vaega faaupufai lenei ua silafia e le toatele o le HRPP ma o le mau lea a lona taitai, le alii Palemia, Susuga Tuilaepa Lupesoliai Sailele Malielegaoi.
O le faamatalaga a le Susuga Tuilaepa, ua lē ogatusa lea maopoopoga ma faamatalaga o loo faaauau ona agiga i Samoa ma atunuu mamao mai i nisi o perofeta taufaasese, e faapea ua vaivai le HRPP.
O feeseeseaiga i totonu lava o le Faafaletui a le HRPP na amata ai lava ona lagalaga i le tausaga na tea nei le maopoopoga o lea vaega faaupufai ae o na masalosaloga uma na saunoa le taitai i le faamanatuina o le 35 o tausaga o le Vaega Faaupufai, e lē moni ae o le matua lava o le patī o le manino foi lea o le malosi.
O le susuga i le Faafeagaiga o le afioaga o Aai o Niue, Rev.
Efu Efu na saunia le faigalotu e faamanatu ai le Aso Fanau o le HRPP, ma na saunoa ai i le tautua ua leva a le vaega faaupufai ma le faamalosi ina ia faaauau le taitaiga o Samoa i taitaiga lelei. Ia faaauau ona taitai ma le alofa i tagata o le atunuu.
Mo le Alii Palemia e fai o le tele o galuega na tauasa mai i le 35 o tausaga talu ona faavae le HRPP o se tasi lava lenei o laasaga maoa‘e ua mafai ona faatino i lalo o le vaavaaiga a le HRPP, o le see ese o Samoa mai i le lio o atunuu matitiva o le lalolagi.
Ta‘ua e le alii Palemia, ua mae‘a le 50 tausaga talu ona malaga mai Samoa o se malo tutoatasi ae na iloa lava o se atunuu e laitiiti le tamaoaiga pe ua ta‘u mativa foi ma e talu ai o le laitiiti ma le ma‘ale‘ale o Samoa i le itu tau i le siosiomaga faanatura o lea na faaauau ai lava ona faaigoaina o se atunuu mativa.
E ui o lea ua tele nei tausaga o feagai Samoa ma puapuaga faanatura, peitai o loo faaauau lava ona vaaia le finau ina ia mafai ona tali atu i ia luitau ma ua mafua ai le finagalo o le faalapotopotoga o Malo Aufaatasi, ua mafai ona see ese Samoa i le ta‘u mativaina ae see atu i le lio o atunuu ua mafai ona tau atia‘e ma siisii pea i luga le tamaoaiga o ona tagata.
I le taitai o le HRPP, o le tasi lenei o laasaga tele ua mafai e le Malo ma tagata o Samoa ona faatino ona o pulega ua faatautaia e le vaega faaupufai lenei ua faamanatu lona 35 o ona tausaga le HRPP.
O le tausaga e 1982 na aloaia ai le tulai mai o le HRPP i faiga faaupufai o Samoa ae o le tausaga e 1979 lea na amata ai ona tuufaatasia lenei vaega i le taumafai e iai se leo e tali atu i faigamalo sa iai i lea vaitaimi e pei ona iai ni faaletonu o le tamaoaiga ma ua amata ona vaaia le tetee o tagata o le atunuu i le mativa o le atunuu.
O le Afioga i le Aloalii, Vaai Kolone Vaai ma le Afioga i le Tootooalii, Tofilau Eti Alesana taitaia le vaega faaupufai lenei o le HRPP mai i lona amataga mai, ma o i laua atoa ai ma nisi o toa o le HRPP ua fai i lagi a latou folauga, na faapea ona manatua uma i le aso fanau lenei o le HRPP.
