O le naunau o alo ma fanau a le atunuu faapea le au tino matutua o loo galulue e faaauau pea le olaga aoaoina i se isi sitepu e maualuga atu o faailoga ma tusipasi, ua iu manuia ai le taumafai o alii ma tamaitai sa ave a latou mataupu i le Iunivesite aoao a Samoa faapea nisi o le fanau sa maua avanoa sikolasipi e ave ai a latou mataupu i le Iunivesite a le atunuu ina ua mae‘a le tausaga amata o aoaoga faaiunivesite.
E 341 i latou ua umia nei faailoga Tipiloma i tomai faatausitusi, pulega, faaaogaina o masini computers, o aoaoga, le aoaoina o le mataupu o le matematika, faapea le tomai faatausi soifua.
O le isi vaega ua umia Tusipasi i tomai tau pisinisi ma le pulega faapea le aoaoina o mataupu tau masini komipiuta.
O nisi o faailoga maualuluga ua maua e nisi ua faaiuina le taumafai o le Bachelor i mataupu faasaienisi ma le Master i tomai tau le aganuu ma le gagana Samoa.
O le toa 45 o le aufaauu o i latou o le a galulue i le tomai faafaiaoga i le vaega o aoga maualuluga, ae toa sefulu tausi soifua ua maua le faailoga Tipiloma i le faatosaga.
O upu timai a le sui Palemia na saunoa i le saunoaga autu, ia faamaoni ma finafinau i mea lelei, ae le o le manatu ifo ua atoatoa lona poto ma le atamai aua a sese o le iuga o Tafaigata i le nofoaga o le au nofosala.
