34 tausaga o le HRPP ausia matatia tetele i ana pulega

O le faailogaina ai o le 34 tausaga talu ona faavae ma faatu le vaegafaaupufai e puipuia aiātatau o tagata le HRPP, e tele luitau faigata sa feagai ma le pati e pei ona saunoa le taitai, le afioga i le Palemia, Susuga Tuilaepa Lupesoliai Sailele Malielegaoi, i le faailogaina o le asofanau i le nofoaga tutotonu o le vaegafaaupufai, i le Aso Tofi na tea nei, 18 o Aperila 2013.
Peitai o ia luitau uma e tasi lava le sini sa taulai i ai fuafuaga, o le faaleleia o le atunuu i atinae eseese mo le manuia o tagata uma. Saunoa le taitai o le manulauti foi lea o loo tauave pea i galuega ma fuafuaga fai a faigamalo e tulai mai a le HRPP, o le mea e lelei i Upolu e lelei foi i Savaii.
E fā vaega tāua o galuegafai a le vaegafaaupufai ua ausia talu ona tu i le foe i le faatautaiga o le Malo, e aofia ai le aveesea ma le lisi o atunuu e vaivai tamaoaiga lea e amata i le tausaga fou ona lē toe iai Samoa, ae o le a see atu i le vaega o atunuu ua lelei ma malolosi o latou tamaoaiga.
O le tasi o vaega na ta‘ua e le taitai o le Malo ma le vaegafaaupufai, o le faailoa talu ai nei o le avea o Samoa ma atunuu laititi i le lalolagi ua na ausia se tasi o manulauti o le meleniuma, o le lē toe iai o se tagata e mativa i le fia taumafa.
O le tasi vaega ua ausia o le ofi o Samoa i le faalapotopotoga tele o fefaatauaiga saoloto a le lalolagi le WTO, ma le talia o le ofo a Samoa e talimalo i le fonotaga tele a malo laiti o loo avea ma sui o Malo Aufaatasi lea e faia i le tausaga fou.
I le itu i le tausia o le soifua maloloina na fautua ai le alii Palemia i le itupa o tama tane o le vaegafaaupufai, ina ia taumafai e agai e vaai se fomai ma siaki ai le soifua ina ia iloa ai poo atoatoa le malosi poo iai ni gasegase o aafia ai.
Na faaalia e Tuilaepa o le gasegase o le kanesa o se tasi lea o faama‘i ua toatele alii ua aafia ai aemaise le gasegase o tane le prostate cancer.  O loo pito vave ona maliliu le itupa o alii nai lo tamaitai, ma o le fautuaga a le Palemia o le isi lea mafuaaga o le maua o le faalua a le loomatua i le isi ana faaipoipoga, auā ua vave ona nofo toatasi le tina ina ua alu i le malaga tuusao le toeaina.
Na tumutumu le nofoaga tutotonu o le vaegafaaupufai i Sogi i le toatele o sui lesitala ma sui lagolago faapea malo valaaulia i le faamanatuina o lona asofanau ma le fono faaletausaga, lea ua tofia ai ni sui se toatolu e avea ma sui o le komiti a le vaegafaaupufai, e aofia ai ma le sui tamaitai e toatasi, ua filifilia i ai le faletua o Tamaitia Fasavalu Tanielu.
O ia o se tasi o tina iloga i le pisinisi a lona aiga o le faatau i fafo o le sua o le nonu.