O faaiuga a le faamasinoga maualuga i Mulinuu i le solitulafono o le gaoi ae faamaonia o le falepuipui. E itiiti lava ni moliaga faapea e lē nofosala i le toese, ae nofo vaavaaia mo se taimi ma faia ni galuega e aunoa ma se totogi mo le lelei o tagata lautele.
E mafua ona eseese faaiuga a le faamasinoga i le solitulafono lava lea ona e iai vaega e faasino i le tagata ua molia e tāua i le faamasinoga ona silasila toto‘a i ai, e le gata o ona tausaga i lona matua, o le tulaga i lana aoaoga, o lona siosiomaga i totonu o lona aiga ma le nuu, faapea ma le itu tāua o le toe totogi o se tupe na aafia i lana solitulafono.
O le tamaitai o Bolivia Smith o Vaiala, e nofo i Samoa a o ona mātua e faamautu i Niu Sila. E 34 ona moliaga o le gaoi na faamaonia faasaga ia te ia ina ua mae‘a ona valaau molimau a leoleo ma le molimau a lē na molia.
O ia moliaga na mafua a o galue le tamaitai i le kamupani o le Computer Service Limited, le CSL i Apia i le va o le tausaga e 2006 ma le 2009, a o galue i le kamupani o se tasi o inisinia o masini computer mo fesootaiga faaonaponei.
O le 23 o ona tausaga na aafia ai i le solitulafono, ae suesue ona moliaga e le faamasinoga ma faia le faaiuga ua 26 tausaga o lona matua. E lavelave le silasila a le faamasinoga i moliaga o le tamaitai, ona o mau sa tuuina atu e faapea e iai foi nisi o inisinia ma kesia na aafia i le faiga o le gaioiga lea sa tutuli ma faamalolo ai.
O le maualuga o le aoaoga a le tamaitai e tāua i le faamasinoga, faapea le molimau tusitusia a lana faifeau sa ta‘ua ai o ia o se tagata e lelei ma faatuatuaina, auā o ia foi o se tasi e tuu i ai le taitaiga poo le leadership.
I lona siosiomaga faaleaiga, e manatu le faamasinoga o le nofo eseese o Bolivia ma ona mātua lea e nonofo i Niu Sila o se isi mafuaaga lea o lona faia o le solitulafono ona ua leai se taitaiga faamatua. O le manatu o le faamasinoga o se tamaitai e manaomia tele se taitaiga lelei mai totonu o lona aiga.
O le lipoti a le ofisa faanofo vaavaaia sa ta‘ua ai itu lelei tele o Bolivia ma fautuaina ai se faasalaga faanofo vaavaaia ae lē o le falepuipui. Peitai sa fautuaina e le itu a leoleo se faasalaga faafalepuipui e lua tausaga ina ia iloa ai e isi tagata e faia le solitulafono o le gaoi e mamafa ma ogaoga lona taunuuga aemaise ia ave i le toese ina ia malu lelei ai le puipuiga o meatotino a le aufaipisinisi. O le tasi itu sa faamamafa e leoleo o le gausia o le faatuatuaga le breach of trust a le kamupani na ave i lē
ua molia.
O le aotelega o le faaiuga a le afioga i le faamasino o Lesatele Rapi Vaai sa ia ave ai le lagolago i le lipoti a le ofisa faanofo vaavaaia ma le finauga a le loia sa tulai mo le tamaitai o Bolivia. Faaalia e Lesatele Rapi Vaai o se tamaitai e telē sona sao tāua i le atunuu e fua i ona tomai o loo umia, ma e lē o se tagata foi e faapea na te faia se gaioiga e lamatia ai le saogalemu o tagata lautele.
O le faaiuga ua nofo vaavaaia Bolivia Smith mo le 18 masina, faaopoopo i ai le 60 itula e galue fua ai. Ua faatonuina foi na te totogi le tau o le faamasinoga na tuuina atu e le itu a leoleo e $2,000, ma e tatau ona totogi ta‘i $200 tala i le masina. O le totogi muamua e tatau ona faia i le aso 29 o le masina nei o Mati.
E $6,818 se tupe a le CSL na aafia i le solitulafono, ae na toe totogi e mātua o le tamaitai i le kamupani se taui e $8,000 o le tasi lea o vaega tāua sa ave i ai le faamamafa a le faamasinoga i lana faaiuga.
