31 alii ma tamaitai ua sauni mo galuega faaleoleo

E toa 31 le vasega fou o alii ma tamaitai leoleo o le Malo ua sauni e faatino le galuega faaleoleo ina ua maea le 4 masina na feagai ai ma aoaoga i mataupu i le tausia ma le faamalosia o le tulafono, aemaise o le puipuia o meatotino a le Malo ma tagata lautele. O le vaiaso talu ai na faatauto ai le vasega fou o leoleo i se sauniga na faia i le faamasinoga faaitumalo. O ia tautoga ua ofo atu ai o latou soifua e tautuaina le atunuu ma le Malo o Samoa e ala i le mulimulitaia o tulafono ma le tutusa o tagata uma i le latou galuega, e aunoa ma ni faiga faaalatua ma faaituau. Ua ave foi ia i latou le faalagiga pito maualuga o Malu o le Malo.

O le Aso Faraile la na tea nei sa faia ai le latou faauuga e sami ai le maea o a latou aoaoga. E toalua nisi o lea vasega fou o leoleo ua le taunuu lo la faamoemoe i le avea ma leoleo, ona na faamalolo ina ua aliae ni amioga e le talafeagai ma le galuega faaleoleo. O se tasi lenei o moemitiga a le toatele o matua i Samoa, ina ia ausia e se tasi o le fanau lenei foi galuega i totonu o le malo, e tautua ai mo le lelei lautele o le atunuu, aemaise lava i le tausia o le saogalemu ma le tau tineia o le faatuputeleina o soligatulafono.