E fai le leleiga a kolisi o Sagato Iosefo, Avele, ma le aoga o matata eseese a le Katoliko i Alafua o Ioane Poseko poo Don Bosco i le Aso Gafua na tea nei, ae faatuua vave fanau o le Kolisi o Faleata ina ua osofai e ni tamaiti lea na tau‘ai ai le faleaoga i maa.
Fai mai se molimau na tau‘ai atu foi ma ni fagu kalasini ua tutu i le afi. O nisi ia o gaioiga e mafua mai i le vevesi tetele na toe tupu i le taulaga i le Aso Tofi 17 o Mati 2016 lea na vaaia ai i le nofoaga faatali pasi i Savalalo i tua ane o le nofoaga sa iai le maketi ua mu, le taufetuli solo o fanau aoga ona o le vevesi na tulai mai ai.
Fai mai leoleo sa iloa lelei e fanau ua pisi leoleo i le tapenaina o le faatautoga o sui faipule fou o le Palemene faaoso loa ma le vevesi, auā e tupu e lē toatele ni leoleo o tiute i nofoaga masani i le taulaga aemaise i le nofoaga faatali pasi. O suesuega a leoleo ua molia ai le to‘a 29 o fanau, e lē gata o tamaiti aoga ae faapea i fanau sa aooga i nisi o Kolisi i le taulaga o loo aafia a latou tamaiti i vevesi ae ua lē o toe aooga.
E toasefulufā tamaiti ua molia i le vevesi i le taulaga lea e aofia ai ma tamaiti e toafā e lē o aooga. O le osofaiga na tupu i le Kolisi o Faleata e toaono ua molia ai. O moliaga o le umia o aupega matautia, tau‘ai maa, ma le faaoolima, ua faia e leoleo faasaga i ia fanau a le atunuu.
O le toe aliali mai o nei vevesi ua a‘e ai se lagona i le toatele o le au matutua ua tatau ona toe faataga faiaoga e sasa fanau. “O le fua aliali la lea o le faaofi mai o faiga a fafo e faasā le fasi o tamaiti e faiaoga ma mātua, lea ua leai se kea o tamaiti ae ua fai lava le mea e loto i ai”.
O le finagalo lea o se tasi o tamalii sa avea ma faiaoga ae ua litaea. O lana molimau o taimi o galue sa sasa fanau ma aoai, ma sa tele le tāua o lea faiga e lē gata i totonu o aoga ae o le aiga foi i le sasa a mātua auā sa leai ni vevesi faapenei e tutupu mai i ni nofoaga faitele aemaise i le taulaga.
Ua faaalia e le afioga i le Palemia le tofa Auelua Fatialofa Lupesoliai Tuilaepa S Maleilegaoi, o le a silasila le Malo i le faatupulaia pea o nei faiga ua aafia ai fanau a le atunuu aemaise ia i latou o loo aooga i le taulaga.
E lei faailoaina e le Palemia poo le ā se gaioiga o le a faia, ae e talitonu le tamalii sa talanoa mai i le tusitala e leai lava se isi faiga sili ona lelei o le toe faataga ona sasa e faiaoga ma mātua le fanau.
“Ua atili le fefeu o amio o tamaiti auā ua latou iloa nei ua matuā sā taputapu ona toe oo atu le lima o mātua poo faiaoga”. O le masina fou e tutulai ai le to‘a 29 o fanau ua molia e tali i o latou moliaga i le faamasinoga faaitumalo. Ua mautinoa foi ua lē toe maua ni avanoa i Kolisi sa aooga ai.
