E 280 afe se vaegatupe ua su ai e lē sa avea ma pule o aoaoga a le faalapotopotoga o le malosi tau eletise, o Lesaisaea Reupena Matafeo, le alii pule ma le faatonu o le upega tafailagi o le Talamuaonline ma se tamaitai tusitala o loo galue mo lea auaunaga o tala faasalalau i luga o fesootaiga televavave tau komepiuta.
O le tagi e totogi lea vaegatupe tele e mafua i se lipoti a le Talamua na faasalalau ai le faamalolo lē tumau o lē o loo tagi ona o suesuega faalotoifale a le malosiaga tau eletise lea sa faatautaia e le suetusi sili a le Malo.
O loo finau le itu tagi na faasalalau e le upega tafailagi lona suafa ae o loo teena e le faatonu o le upega tafailagi lea vaega o le tagi.
O taualumaga i le Aso Gafua na tea nei i le Faamasinoga Maualuga na faaulu ai se talosaga a le faatonu ma le upega tafailagi ina ia faalēaogā lenei talosaga poo se su, ona e leai se mea e tasi o le lipoti na faaleaga ai lē o loo talosaga.
O loo finauina foi i le talosaga lenei ua ta‘ua o le strike out motion e faapea, o le faaulu o le tagi a Lesaisaea Reupena Matafeo ona o se gaioiga e osofaia ai lē e ana le upega tafailagi, poo se personal attack.
E mafua lea personal attack ona o nisi o lipoti e fesootai ma nisi o mataupu sa tuuaia ai le itu tagi, e pei o se suesuega na faia faasaga i ai a o avea ma pule o le Pulega o Tagata Tafafao, ma le faamasinoga o se tasi o ona alo na molia i le ave taavale matautia na mafua ai ona maliu se alii Kiripati.
E lua vaiaso ua tuu e le faamasinoga i le itu tagi e tali atu ai i le talosaga e faalēaogā le fofogaina o le su, ona toe valaau ai lea o le mataupu i le aso 23 o le masina nei o Iulai.
