$270,000 faamaonia mo atina‘e o togatogo

O le tinoitupe lenei, $270,000 tala, ua agavaa i ai le Sosaiete o le Siosiomaga, e tauala mai i le polokalame o fesoasoani mo faalapotopotoga tuma‘oti ma atina‘e o nuu, le Civil Society Support Programme (CSSP).

O lea fesoasoani sa talosagaina e le sosaiete a le Siosiomaga mo le atina‘ega o togatogo, o se polokalame o loo taulamua ai le sosaiete i le taimi nei. Ua tauaao atu nei i le peresetene o le sosaiete, Sala Tuiafiso Sagato le vaega muamua o le fesoasoani, lea e $160,000 tala ma ua amata faagasolo ai galuega faaleleia o le polokalame mo togatogo.

Ona o tulaga i fesuiaiga o le tau ua iai nei le lalolagi, ua ave ai pea le faamuamua a le sosaiete o le Siosiomaga i le faaleleia ma le atina‘ega o togatogo ona e iai lo latou talitonuga, o se atina‘e tāua tele mo le atunuu.

Faaalia e le faatonu o le sosaiete o le Siosiomaga, Fiu Mataese Elisara, o loo faagasolo pea le fesoasoani mo afioaga ua i totonu o le polokalame ma ua tilotilo foi i le faalautele atu i nisi o afioaga o le a filifilia e talafeagai ai lea atina‘e.

Na ia ta‘ua foi, e na o le fa pasene (4%) o le gataifale o le atunuu o loo mafai ona tali faafitauli o le tsunami i le taimi nei, o lona uiga e 96% le puipuiga o loo manaomia.

“Ua mae‘a suesuega a saienitisi, ma o loo maua ai e lē gata ina tāua togatogo mo le fofoga taumafa, ae o meaola foi o loo faafailele ai, ma le isi itu tāua, o le 100 mita o lea atina‘e e mafai ona talepe le malosi o se galulolo poo le tsunami e ono aafia ai le atunuu,” o se saunoaga lea a Fiu.

O nisi o afioaga sa amata ai lea atina‘e i le tausaga na tea nei, e aofia ai Matafaa, Faleseela ma Tiavea-tai ma sa lagolago foi le Malo i lea faamoemoe o le Sosaiete o le Siosiomaga e ala i le faalapotopotoga o Punaoa faalenatura ma le Siosiomaga (MNRE) ina ia faasolo ai le atina‘e o togatogo i isi afioaga o le atunuu.

I le faamanatuina o le vaiaso o le Siosiomaga i le tausaga nei, sa toe fafagu ai foi le Malo i le tāua o le faasao o togatogo lea ua tatau ona faaleleia. Sa saunoa ai le Minisita o Punaoa Faalenatura ma le Siosiomaga, Faamoetauloa Lealaiauloto Dr Faalē Tumalii, o se taumafaiga ua toe tagatagai i ai le Malo ona o se faasao lea ua ta‘ua o le falema‘i e faafailele ai le ola faalenatura o meaola o loo i le sami”.

Na ia faaalia foi, e fesoasoani tele togatogo i le puipuia o nofoaga o loo lata i le sami mai galulolo faapea lologa e ono aafia ai le atunuu. O le $160,000 tala ua tauaao atu i le Siosiomaga i le vaiaso nei, o le 80% pasene lea o le fesoasoani ua faamatuu muamua atu mo le faagasologa o lea atina‘e, ae o le a fua lava i le faagaioiga o le atina‘e le toe tuu atu o le 20% pasene o loo totoe lea e tusa ma le $110,000 tala.

Na faafetaia e le peresetene o le Siosiomaga lea fesoasoani tāua ma e talitonu le sosaiete o le a aga‘i sa‘o lea vaega tupe i le atina‘e o togatogo o le manuia lea o le atunuu atoa.