Ua faalauiloa aloaia mai ai e le ofisa o taaloga a le Pasefika i Samoa le aofaiga atoa o taaloga eseese o le a faagasolo ai nei taaloga a le Pasefika lea e talimalo ai Samoa i le masina o Iulai o le tausaga fou 2019. E 26 taaloga eseese mo taaloga nei a le Pasefika faatusa atu i taaloga e 37 na faagasolo ai taaloga a le Pasefika i le tausaga e 2007 e pei ona sa talimalo ai foi Samoa.
Na faailoa mai e le ofisa sili o taaloga a le Pasefika i Samoa le susuga ia Falefata Hele Matatia, o taaloga nei e 26 na faamoemoe e talimalo ai le Malo o Toga peitai na toe togi loa le solo a Toga e le fia talimalo ai i nei taaloga, aumai sa’o loa le 26 lenei e tapena iai Samoa mo taaloga i le tausaga fou.
O nisi o taaloga e ta’i lua vaega eseese e faatino ai e aofia ai le miliga aau (swimming) e faia ai i le Aquatic Centre i Tuanaimato ma le open water swimming lea ua faatulaga mai e faia i le Afioaga o Faleasiu, o le taaloga o le Basketball e lua foi vaega e faatino ai e aofia ai le 3*3 ma le 5*5 ma e faia uma i le Gym 2 i Faleata, o le taaloga o le tenisi le isi taaloga e lua foi ona vaega eseese, o le table tennis e faia ai i le Havest Centre i Faleata ma le Tennis e faia ai i le malae tenisi i le Apia Park, tasi le taaloga ua faamautu mai lona faatinoina ai lea i le motu tele i Salafai, o le taaloga lea o le boxing.
Na faapupula mai foi e le ofisa sili o le SASNOC le susuga Tuala Mathew Vaea, le amata faagasolo ai lea o polokalame tau aoaoga a le ofisa o taaloga a le atunuu, e a’otauina ai pulega o au taaalo taitasi aemaise lava i faiaoga ma taitai malaga ina ia o latou silafia a latou matafaioi i le taimi tonu e faataunuu ai taaloga a le Pasefika. Saunoa Tuala, o le isi vaega o ave iai le faamamafa, o le saogalemu lea o autaaalo a Samoa mai i le faaono aafia ai i nisi o faafitauli i le taimi o taaloga aemaise lava i faama’i pipisi solo, ma o nei a’oa’oga uma e taua foi le aumai ai o le leo o sui taaalo ina ia o latou silafia ai le tele o le taua o lo latou sao i le taligamalo a Samoa.
Faailoa mai foi e le pulega o taaloga nei a le Pasefika i le atunuu le sauni ai lea o le Malo o Samoa e tuuina atu aloaia fale taalo uma agai i le Malo o Saina i le aso 3 o Setema mo le toe faaleleia ma le toe faafouina aua nei taaloga, ma le faamoemoe e toe tuuina aloaia mai e le Malo o Saina agai ia Samoa i le faaiuga o le masina o Me o le tausaga fou a’o lei amatalia alaoaia ai taaloga i le masina o Iulai 2019.
Faailoa foi e Matatia le faatupe uma ai e le Malo o Saina o mea taalo ma le tele o vaega e manaomia mo le faatinoina o nei taaloga.
I le polokalame ua faataatia mai mo le lua vaiaso o nei taaloga, e amata ai i le sauniga aloaia e tatala ai taaloga a le Pasefika i le aso 7 o Iulai, o le Aso Sa lea i le malae taalo o le Apia Park ona faagasolo loa lea o taaloga i le Aso Gafua e sosoo ai, o le sauniga e tapunia ai taaloga ua faamoemoe i le Aso Toonai 20 o Iulai, o le Matagaluega o Aoga, Taaloga ma Aganuu o loo gafa ma le tapenaina o nei sauniga tetele e lua e pei ona saunoa iai Falefata Hele Matatia.
E pei ona silafia e na’o le $11 miliona tala le vaega tupe atoa ua faaagaga ai e le Malo mo le tapenaina atoa o nei taaloga i le 2019, o le isi vaega o lea tupe o le a mafai ona totogi ai le tele o faletalimalo i le atunuu lea e faamautu uma ai au taaalo, o pulega o au taaalo aemaise o i latou o le a gafa ma le faatinoina o taaloga taitasi.
O le nonofo ai o au taaalo i fale talimalo ua manatu ai le pulega o nei taaloga i Samoa e pito sili ona taugofie atu nai lo le faiga lea na fai a’i taaloga i le 2007, e tapena ai faleaoga ma nofoaga le tumau lea e latalata i le $7 miliona tala e faaalu ai peitai o fale talimalo e latalata i le $4 miliona tala Samoa, faatasi ai ma le toe ave sa’o lava o nei seleni i pisinisi a tagata Samoa i totonu lava o le atunuu.
O loo taumafai foi le Ofisa Sili o nei taaloga Falefata Hele Matatia, e faaaogā lava tagata Samoa ma pisinisi Samoa e faafoeina nei taaloga nai lo le tau aumai o papalagi mai atunuu e mamao ma alu ai tupe e tele a le atunuu.
O le naunautaiga o Matatia, ia lelei atoatoa nei taaloga faatasi ai ma ni faaiuga lelei e maua mai i taaloga eseese nei e 26.
