$25,000 o le a tuuina atu mo le Mapu i Fagalele

Ua savalia nei le lima o tausaga o loo faataunuuina pea e le Susuga Taa Lotam ma le faletua ia Ima, le tapenaina o se taumafataga tuufaatasi mo tama ma tina matutua o le atunuu o loo alaala ma papaaao i Aukilani. Peitai o le faamoemoe o loo avanoa pea lava foi mo nisi o matua matutua e malaga asiasi mai, i le taimi tonu o lea foi faamoemoe.
O le agaga maualuga o le susuga ia Taa, o le fia mafuta pea i matua ma ia maua pea lea fesootaiga e pei ona masani ai a o lei tuua le atunuu ma malaga mai i Niu Sila nei. E le gata i lea, ae o se avanoa lelei foi lea e faafetai ai i le latou galuega faifai pea i aso uma, aua le tapuaia o faiva alofilima o tamafanau a le atunuu, e ala i talosaga molia i luma o le Atua.
O le afiafi o le Aso Faraile na tea nei mai le itula e ono, sa faatumulia ai le fale tele a le Manhattan i Mount Roskill, i le mamalu o tama ma tina matutua, sa afifio ane e talia le valaau faapitoa a le Susuga Taa ma le faletua ia Ima, e pei ona masani ai i tausaga taitasi.
O foliga o le fiafia ma le olioli sa vaaia i lea foi afiafi, ina ua mafai ona toe maua le avanoa, e feiloai ai ma lululima ai le isi tama i le isi tina, a o le tasi tina i le tasi foi tina, ma toe faamanatu ai talanoaga ma masaniga mai aso ua leva.
Sa matauina i lea afiafi le felanulanuai, fai o le matagofie ma le mananaia o teuga faa-Samoa e masani ai ma onomea ai, o pea ma puletasi a loomatutua, ae o le uigaese foi ma le onomea o toeaiina i nai a latou foi tamai teuga, i le faaalia o aloa ma ie faitaga. O taga eseese sa faailoa i lea feiloaiga, o tamā sa masani ona le fiafia e talatalanoa, ae ua matua alu ma le atoa le talanoa ia.
O nisi foi o tina e maua i le faamai o le matamuli ma le le fia masani, ua le faatuaoia le toso o le ili ma le faafetaui tauau latou.
O aga uma lava ia sa vaaia ma maitauina i lea po. Sa fesiligia e le tatou nusipepa nisi o tama ma tina matutua, poo a ni lagona, a o le a foi se taua ia i latou o lea faamoemoe.
O le tali mai e faapea, e leai nisi lagona, ua na o le loto faafetai lava, ma le agaga fiafia, ona o le maua pea o le mafutaga ma feiloaiga, aua e seasea ona maua ni taimi faapea, aemaise o lenei atunuu, e nofonofo lava le tagata ia i si ona pausisi, ma maalili ai.
O le tulaga tau faafiafiaga, sa iloga lava foi ona le tele i se pito, pei o le agana masani a tamaiti, ae na matua tuvaelua ai toeaiina ma loomatutua, ina ua maua le avanoa e sisiva ai ma pepese faatasi.
O le siva faagesegese, o siva topetope, ma le siva uosi, e lei iai ma se avanoa na tuu i ai, sa matua laga uma i luga taleni ua leva ona tatanu, ona o le fiafia lava. O le taumafataga sa matua lelei foi ona saunia, o le faili foi sa talafeagai lelei ma le agaga o lea po. O le susuga ia Tenari ma le tamaitai lauiloa mai Samoa, o Cindy sa nafa ma le usuina o pese e sausaunoa ai le auvalaaulia.
O le susuga ia Tavai Meni sa fai ma Fofoga o le po, o ia foi sa faagasoloina fuafuaga uma ma faasoaosa faaaliga o aitema mai tama ma tina. O le maea o le taumafataga ona fai ai lea o tauofoga masani, atoa ai ma ni taaloga e manumalo ai i faailoga sa tapena i ai le susuga ia Taa ma le faletua.
O le tele o oloa sa fai ai faailoga, o nisi o foai mai paaga ma uo faapisinisi a le susuga lava ia Taa.
O le seleni sa mauaina ma tauaaoina i lea po mai le au valaaulia ma kamupani sa lagolagoina le faamoemoe, e tusa ma le $25,000. Saunoa Taa, o lea vaega tupe o le a tuuina sao atu mo le pulega ma le falemai o tagata matutua i Mapu i Fagalele, mo le faaaogaina i manaoga sa tuuina mai o loo fia maua ai se fesoasoani.
Na taualuga lea po i le sausaunoaga faa-Samoa a tausala mai le motu tele i Salafai, e pei ona fofogaina e le faletua ia Iiga Sanerivi, o se tasi foi o tinā sa tautua ma lona aiga i le tulaga o le Loia Sili a le Malo i tausaga ua mavae.