Ua faalauiloa e le Malo e $24 miliona tala lea ua faamaonia e le Kapeneta mo le toe faaleleia o nofoaga ua afaina ona o le afā o Eveni.
O se faiga ua mulimuli mai i finauga i le Palemene e pei ona faailoa mai ai e le Tautua Samoa ua iloa lava e lē o tele se tupe na aumai i atunuu i fafo e tali atu ai i nofoaga na faaleaga e le afā i le faaiuga o le tausaga, peitai o loo ua tumau le manatu e tatau lava ona saili e le Malo se seleni e fesoasoani ai i puapuagatia o i latou ua mautinoa ma faamaonia le matuā afaina lava.
O le tele o aiga na afaina i le afā ua toe agai lava i latou ia e saili fesoasoani mai i aiga i fafo auā le toe fausia o fale ua faaleagaina – o nisi ua usitaia lapataiga a le Malo e agai i o latou aiga ma fanua i nofoaga maualuluga ona e toe tulai mai foi lologa ma tafega i le lumanai ma ua matuā lē saogalemu lava nofoaga na nonofo ma faamautu ai.
Ae o loo iai lava aiga o loo faamautu pea i lotoā o lotu i totonu o o latou nuu ona ua matuā leai lava ni aiga e tua i ai, leai ni fanua a uta e agai i ai ma e leai foi ma se faamoemoe i ni aiga mai i fafo e maua mai ai se fesoasoani. O lea la ua faalauiloa le fesoasoani lenei a le Malo ae ua faaauala mai i nonogatupe. O le tupe lenei ua agai i le faletupe o atinae ma le faalapotopotoga o fale (Housing Corporation).
O ina ua tatala ai le avanoa mo aiga ia ua faaleagaina o latou fale e talosaga ai mo ni nonogatupe ma e laititi le tului ina ia mafai ona maua se fesoasani i lenei taimi. E fā pasene o le seleni a le au faisaofaga a le NPF lea foi na faasafua mai i le vaiaso na tea nei mo le faamoemoe lava lea ina ia iai sina seleni e tagolima i ai aiga ua afaina i le afā aemaise ai le feagai ma le a‘e o aoga a le fanau.
E silia i le $10 miliona tala le tupe na faaagaga mo le tului lea a le NPF. O le faamoemoe ole Malo ina ia iai lenei faamāmā avega mo aiga ia ua matuā leai lava se isi faamoemoe e maua mai se fesoasoani e toe fausia lelei ai fale ma saili ai nisi nofoaga e agai i ai ona o le faaleaga uma o fale ma fanua i le afā o Eveni.
