O se fuafuaga poto ma le atamai sa faataunuuina e le komiti a mātua ma le aoga a le Mua i Malae i Grey Lynn, i le faia lea o sa latou sailiga seleni i le taimi ma le aso tonu na faia ai le faaaliga muamua o le ata tifaga o le Tulafale, The Orator, i le fale tifaga i le pitonuu o Beach Haven i Northcote i le vaiaso talu ai.
O le sailiga seleni a le aoga a le fanau i Mua i Malae, sa faia ona o le manaoga faapitoa mo le toe faaleleia o le faletusi, atoa ai ma tusi aoga a le fanau.
Sa tumutumu le faletifaga i le mamalu o le atunuu, ma le aufaipisinisi ona o le fia maimoaina, peitai sa auai faatasi ma sui o le aoga ma le aoga i le tuleiina o le faamoemoe.
Sa faamaonia mai e se sui o le komiti a le aoga, le tamaitai o Feonnaa Wall e faapea, sa fiafia tele i taualumaga o lea po, ona o le lagolago o mātua ma i latou sa auai ona e lē gata i le maimoaina o le ata Samoa, ae faapea foi ma le fesoasoani ane i le sailiga tupe a le fanau ma le aoga.
Sa faafetai foi le komiti faapitoa, mo a latou paaga i isi o aoga, ma pisinisi sa auai ane faatasi i lea afiafi.
O le Aoga Faa-Samoa, Aoga Mataaga, Kowhai Intermediate, Grey Lynn Business Association, PCIFICA Association, Rev Mua Pua, Albert Wednt, Auckland City Coucil, Pasifica Arts, faapea tagata lautele sa togi maa ma fesoasoani ane i le faaputuina o le seleni na maua i lea po.
O nisi o paaga sa faafetaia foi e le aoga e aofia ai kamupani sa lagolago ane i nisi o auala sa faatupulaia ai le tupe maua, o le Popo Hardware, Mena, West Lynn Meat, ma le Fruit World i Richmond Road i Grey Lynn.
O le Ripe Delicatessen, i nisi o taumafa suamalie ma faailoga sa ofoina, faapea uiga tausafia ma le fiafia sa lagolago ai.
O tagata taitoatasi sa foaia foi nisi o taumafa ma meaalofa tau tupe, e pei o Vinita, Tiare, Neemia ma Tuvaa, faapea le tina ia Lila Vagana.
Sa faafetaia foi le susuga ia Tusi Tamasese, ona o le ata matagofie tele, sa avea ma auala e faaui ane ai le sailiga seleni a le fanau.
O le tupe e pei ona taulimaina e le aoga Mua i Malae, o le a faaaogāina mo le faaleleia o tusi aoga, alagaoa mo aoga a le fanau, faapea ai ma le faletusi.
