E le mafai e upu ma tala ona faamatalaina le agaga faafetai o le Faatonu o le Penina o Asuisui 1197AM i Brisbane, le tofā ia Fiu Tamala Malatai Fiu ma le aufaigaluega ona o le lagolagosua a le paia ma le mamalu o le atunuu o alaala ma papaao i lenei aai.
O le laasia o lea fuainumera tele, e lagona ai le fiafia ma le faagaeetia, ma o le viiga lava e sii pea i le Atua le Tamā, ona o le maualuga o le aao foai ma le agaga alofa o le aufaigaluega paia a le Atua ma faletua, faapea ekalesia ma faalapotopotoga, tamalii ma failauga, le aufaipisinisi ma le loaloa o Samoa i Brisbane.
O le Atua lava ia e sasaa ona manuia e tele i lē sa foai ona o le naunautaiga ia toe faaopoopoina taimi e tautua ai le atunuu i luga o peau ma galugalu o le ea.
Talu ai ua iai se faamoemoe e toe faateleina taimi faasalalau, na talosagaina ai le atunuu o nopia‘i i Kuiniselani mo se fesoasoani, ma sa lei talituālimaina lava le faatalauula.
O le Aso Sa, aso 7 o Mati mai le ono i le taeao seia paia le 12 i le aoauli, faapea le fitu i le afiafi seia oo atu i le tasi i le vaveao, na atofaina e faataunuuina ai lea faamoemoe o le leitiofoni.
O le polokalame o le taeao sa auai mai le Peresitene o le Mafutaga a le Logan Samoa Advisory Council Inc, afioga ia Faimalo Faleiva Tau, le Failautusi, susuga ia Site Ah See, le Teutupe ia Anne Siakisini, susuga i le toeaina o le Ekalesia Aso Fitu Tutoatasi ia Tapuala Setefano Tino e lagolagosua i le aufaigaluega, Fiu, Rosa, Teera ma Tony.
Na faamauina ai se aofaiga tupe e tusa ma le $7,600.00.
O le toe ta i le afiafi sa faatumulia ai le ofisa faasalalau i le afioga i le Peresitene o le Mafutaga a le Logan Samoa Advisory Council Inc – Faimalo Faleiva Tau, failautusi ma le teutupe (Anne ma Site) faapea nisi o tamālii ma failauga le tofā ia Taefu Patea Taefu, Taveuveu Hunkin, Tamala Seumanu Folau ma le tausi ia Si‘ulepa Fetoa‘i, ma le faatonu ia Fiu ma Terry Filimaea Fauea ma le autalavou, aemaise nisi o faipisinisi e pei o le tofā ia Fata Peteli o le Matau‘aina’s Takeaway, faapea le Susuga ia Niko Burgess o le Runik Polynesian Town lea sa ia ofoina le laptop e ova lona tau i le afe tala e fai meaalofa ai i le tagata e sili lana foai, lea na mauaina e le faafeagaiga o le Ekalesia Aso Fitu Samoa Tutoatasi i Ipswitch, le susuga ia Pr Faamalologa Fuimaono ma le faletua ia Tamara ma le aiga, sa latou foaia le $1,300.00 i le leitiofoni.
Na maua le avanoa e faafofoga ai le mamalu o le atunuu i le tofa ia Fata e iai lona tomai faapitoa na te tagiina ai soo se ituaiga manu eseese ma na faaosofia ai le aao foai ma le molimanao e tagiina e Fata manu e lei faafofoga ia latou tagi e pei o le povi lea e masani ona tagi e Taavaomaalii Petelo.
E malie foi aufaipese sa fai lea ma ala na le uma ai le fiafia e valaau ma foai.
E $12,780 le seleni na maua i foai i le po ma tuufaatasia ai le aofai e $20,380.00 ae le taulia ai i latou o loo foai pea e oo mai i le taimi nei.
Sa tauaaoina foi ni foai mai nisi setete o Ausetalia e pei o le susuga i le Faafeagaiga le Toeaina ia Faiumu Pio Faletuai ma Koleti o le LMS Toefuataina, faapea Faletuai Tafi Faletuai ma nisi i Robinvale ma Grifith.
Ia iai pea manuia e tele mo le mamalu o Samoa e tusa ai ma le aao mafola e ala i seleni ona o lenei leitio vaivai.
