E to‘a 200 ni avanoa faigaluega e avea ai ma malu o le Malo o Samoa ia ua faasalalau. O se taumafaiga lenei a le Matagaluega o Leoleo ina ia saili ni leoleo e faaopoopo i le galuega o le puipuiga o le atunuu ma sui usufono o le fono tele a Malo Laiti Tau Atiae o le lalolagi le SIDS i le faaiuga o lenei tausaga.
O le vaiaso lenei ua amata ai faasalalauga mo le sailia o alii ma tamaitai e mafai ona galulue mo le matagaluega ia Aukuso ma Setema ma o le vave valaauina o nei avanoa ina ia mafai ona faagasolo aoaoga mo i latou nei o le a tofia.
O le faasalalauga e lē o sau ai ni tomai faapitoa e moomia se‘i vaganā ai le maualuga ma le matutua e tatau ona iai alii ma tamaitai e talosaga atu ae ua valaauina tusi talosaga i se taimi vave.
O le taimi lenei ua latalata i le 2000 le aofai o leoleo a Samoa ua faauuina ma ua galulue i soo se lala o le matagaluega i itu eseese o le atunuu, peitai e mautinoa lava le toatele atu o leoleo e moomia i lenei galuega o le puipuiga o le saogalemu o le fono.
O lea foi ua mae‘a faalauiloa mai e Niu Sila faapea ai Ausetalia le faaavanoa mai o nisi o a latou leoleo mo le faatinoga o nei galuega faapea foi i Leoleo o le Pasefika o loo i lalo o le vaaiga a Malo Aufaatasi (UN Police) ma o i latou nei ua patino lava le latou galuega e pei ona ta‘ua, i nofoaga o le fono i Tuanaimato.
O le toatele o le a feagai ma puipuiga i faletalimalo ma isi nofoaga o le a faamautu ai sui usufono aemaise le leoleoga masani o le taulaga o Apia ma isi vaega o le a tumutumu i ai sui usufono o le SIDS.
E toatele lava foi Leoleo o Samoa ua faitau masina o faatautaia aoaoga faapitoa auā le puipuiga o i latou o le a fai ma sui o atunuu e sili atu i le 190 ia o le a i Samoa i le vaitau pisi o le Teuila auā le fono tele lenei.
E lē tau natia foi le tulaga maualuga o loo vaavaai i ai le matagaluega o Leoleo faapea ai le Malo i le tāua o le malupuipuia o le fono lenei auā o le fono aupito telē lenei ua faatautaia i lenei tausaga e pei ona ta‘ua e le alii Palemia o Niu Sila i lana asiasiga talu ai nei i Samoa.
E lē o iloa poo afea e taunuu mai ai leoleo a Ausetalia faapea ai Niu Sila ma Malo Aufaatasi mo lenei faamoemoe ae o loo iai leoleo o loo faatautaia aoaoga faapitoa i Samoa i le vaitaimi lenei.
O le a fesoasoani foi i latou ia i leoleo e to‘a 200 o le a filifilia e amata aoaoga mo galuega manaomia a le Ofisa o Leoleo e pei ona faasalalauina ai.
