O le tausaga na tea nei, e lua lelei lava masina o tau saili se aniani mo gasesega o taumafa i le atunuu.
O le faaletonu, ua leai se aniani e agai mai i Niu Sila ma na ta‘ua ua tuai ona selesele pe tau toga aniani mai i fafo.
E oo i aniani viole ua agai i ai le atunuu mo a latou taumafa. O le tasi foi lea o mafuaaga o le manatu o ni alii faipisinisi ma faifaatoaga i Samoa, ua tatau ona iai lava lea fua o faaeleeleaga i Samoa pe a mafai ona toto lelei ai. Ua tausaga ma masina e tolu talu ona faatino se faatoaga aniani a nei alii, o Uaea Apelu ma Arona Palamo.
O Uaea Apelu, o lea ua amata ona faatau lana ga‘o e gasese ai taumafa ua gaosi lava i le suauu o le popo.
O se taumafaiga o lea ua amata nei ona faatau atu i Niu Sila. O le toga aniani na ta‘ua e Apelu ua silia ma le tausaga o faatautaia ma e tolu lelei ituaiga eleele poo fanua na taumafai e toto ai ina ia suesue ma vaavaai lelei poo fea le itu o le atunuu e ola lelei ai lenei laau.
O lea la ua faamautu le eleele aupito lelei ma ua lua miliona laau ia ua faamili mo le faatoaga lenei.
Ua iai foi se toga aniani ua faatautaia e le Malo i le fanua o loo toto ma suesue ai fua o laau i Nuu. Ae mo i laua nei na o la ta‘ua sei taumafai foi laua pe mafai ona faatino lea faatoaga mo se taimi umi.
O le faamoemoe na ta‘ua e Apelu o le faatau o le aniani i totonu o Samoa. O le faaiuga o le vaiaso na tea nei lea na faalauiloa ai e le Faletupe Tutotonu ma le vaega o Oloa a le atunuu le siitaga e lima pasene (5%) i le tau o oloa uma ua faatau mai i fafo, ma a manuia faatoaga nei, e mautinoa o le isi lea fua o laau poo le oloa, o le a le toe faatauina mai i fafo.
O loo iai foi le manaoga o nei alii faipisinisi ina ia mafai ona faatau atu i fafo lenei ituaiga aniani peitai e le o le faamuamua lea i le taimi lenei ona o loo iai lava le la faamuamua i oloa faatau i totonu o le atunuu.
O se tasi lenei o taumafaiga ua agai i ai le toatele o faipisinisi atoa ai le au faifaatoaga ina ia saga unaia.
O le tulaga ua iai le siisii pea o le tau o le suauu ma siisii atu ai ma le tau o taumafa, o se tulaga ua mautinoa le toatele i Samoa o le a faaauau, ma e ui o lea ua ofi Samoa i totonu o le Faalapotopotoga o Fefaatauaiga a le Lalolagi le WTO o loo manino le siisii pea o le tau o le soifuaga ma ua saga faamalosia ai lava le toatele o faifaatoaga ma faipisinisi ina ia toto lava i Samoa le tele o nei fua o faaeleeleaga pe a mafai, ma ia le gata ina faaitiitia ai le oge i taumafa faapea ae ia mautinoa e iai se isi laasaga o le mafai ai loa ona faatau i fafo nei ituaiga oloa.
Ua iai foi se faamoemoe i le ga‘o poo le suauu e gaosi mai i le avoka ina ia faatau atu e le vaega o suesuega i taumafa a le Malo le SROS e faatau atu i kamupani i le atunuu.
Ua iai le fuafuaga ua mae‘a ona tuu atu e le kamupani o le Apia Bottling i le Malo ina ia o latou faatau mai masini ma le oloa lenei latou te faatautaia ona o le manaoga ina ia faatau atu le ga‘o lenei i Niu Sila ma Ausetalia ma ua tālia nei se finagalo o le Malo pe mafai ona faamatuu atu lenei atinae i pisinisi tumaoti.
O le faaaliga a le alii pule o le Apia Bottling, o Ulumalautea Papalii John Ryan, ua mafua lava le talosaga i le malo e avatu lea suauu ona o le manao o le kamupani lenei e tali atu i luitau ua mae‘a folasia e le alii Palemia i le taumafai o faalapotopotoga nei a le Malo e pei o le SROS ina ia faatino le gaosiga o nei taumafa ona e le mafai e kamupani tumaoti ona o latou faia.
Faaalia foi e Ulumalautea, e tele tagata e mafai ona maua ai galuega pe a tuu atu ia i latou lenei atinae, aemaise o le itu lea o le a faalautele ma o le a faaopoopo le tele o le suauu e mafai ona gaosi e le kamupani ae tuu ai galuega suesue e faatino e le SROS.
O le SROS lea foi ua gaosia le falaoamata mai i le fua o le ‘ulu ma i‘o o manioka ma o le faatuina o lenei faalapotopotoga ona o le manaoga o le Malo ia atinae lava oloa e mafai ona gaosi i Samoa ma ia pa‘ū ai le tupe faaalu i oloa nei o loo tau faatau mai lava i fafo.
E le gata i lea o le a saili ai nisi o malosiaga e maua mai i fua o faatoaga i Samoa nei, aua le tuuitiitia ai o le suauu e mafai ona faatau mai i fafo.
O loo faagasolo lava foi la ia suesuega i le taimi nei.
