E mafua ona masii se nuu ma se ekalesia i fafo mo se sailiga tupe ona o le mau lava, e sili fafo e lelei seleni e maua ai mo le fausia o se galuega, a lē o se faleaoga o se falesa poo le maota o le faifeau ma le fale o le galuega. Peitai o loo sese tele lea mau pe a vaavaai i le leitiofoni sue tupe a le EFKS a Sapapalii lea na faia i lo tatou atunuu i le faaiuga o Setema.
Na amata le suegatupe i le $60,000 o le sao lea o le ekalesia ma le nuu i ona vaega eseese. Fai mai le faafeagaiga i se talanoaga, le susuga Esera Auatama, o lana tuualalo lea na ave i le nuu ma le ekalesia, ia saili sa latou tupe e amata ai le faamoemoe auā e lelei le vaavaai mai o le atunuu ua amatamea latou ona sasaa atu ai lea o le alofa tulai.
E lei sese le tuualalo a le faafeagaiga ona e latalata i le sefululua i le aoauli ua silia i le selau ono sefululima afe le tupe ua maua ma e tapuni le faamoemoe ua $176,000 le seleni ua umia e le aulotu. O le aso na sosoo ai faasolo i le amataga o le vaiaso na gasolo atu ai isi foai ma ua maua ai le $180,000 ma ona tupu. O se tupe tele lea i le molimau a se sui faasalalau o le leitio o le 2AP o loo masani ona faaaogā mo leitiofoni.
Talu ai nei sa faia ai se sailigatupe o se leitiofoni foi na maua ai le limasefulu afe ma ona tupu, ae o le EFKS a Sapapalii ua faamauina nei o le leitiofoni pito maoae lea ua maualuga se tupe ua maua ai.
O le faamoemoe o le ekalesia mo ia seleni o loo saili ia fausia faatasi le maota o le faafeagaiga ma le hall mo sauniga eseese a le ekalesia. Faaalia e le faafeagaiga ua mae‘a le vaega muamua poo le phase one o le hall, ae o le vaega lona lua lea ua faaaogā i ai tupe o le leitiofoni na maua.
O se konekarate faufale mai Saina o loo faia le galuega, ma o se faamāmā avega mo le aulotu ma le nuu e pei ona saunoa mai le faifeau. E faamāmā avega ona na totogi muamua le 20 pasene o le tau o le vaega muamua ona amata lea, ae saili isi tupe e faamae‘a ai.
E faapena foi i le vaega lua o le galuega, na totogi muamua le 20 pasene ae saili mulimuli le isi vaega na totoe mo le faaumaina.
O Ianuari o le tausaga fou o loo fuafua le konekarate e tatau ona mae‘a ai, ae afai e faaletonu le tau, e mae‘a ia Fepuari ona umusa ai lea.
O se mitamitaga lea i le faafeagaiga ona o le alofagia e le atunuu aemaise o tamafanau ma uo a le aulotu o le latou leitiofoni, auā e moni lava o loo saili tupe le ekalesia aemaise o le fesoasoani malosi a tamafanau a le nuu ma le ekalesia i fafo, ae e tele foi le sao ma le fesoasoani o isi tagata i le galuega.
