O le tamaitai lenei e suafa ia Mercy Tautalagia, e aoga i le Kolisi o Palalaua i Siumu.
O se tasi o le to‘a 200 o fanau aoga a Samoa na talosaga i le Faletupe o le Westpac i Apia mo se fesoasoani ina ia totogi ai lona pili aoga o lenei tausaga.
Ua ono tausaga o faatino lenei galuega alofa a le Faletupe lenei mo fanau aoga a Samoa.
O le tausaga lenei ua taulai le fesoasoani i fanau o loo aooga i Kolisi, Aoga faaitumalo poo aoga maualuluga.
E ave lava le tusi talosaga a le tamaitai poo le alii aoga, o inā e filifili mai ai ai e le Faletupe i lana komiti ua patino i le vaaiga o lenei fesoasoani, poo ai e talafeagai ona ave i ai lea fesoasoani.
O le pili o le aoga i le tausaga atoa ua aofia ai i lenei fesoasoani ma e aofia ai ma se fesoasoani i togiga a le fanau.
O le faafetai a Mercy, o le aofia ai o ia i lenei fesoasoani mo le tausaga 2012.
Faaalia e le pulega o le faletupe i Apia, e 200 lelei lava tusi talosaga na tuuina atu i le Westpac i lenei tausaga.
O le tausaga lenei e to‘a 58 alii ma tamaitai ua faamanuiaina ma ua maua sikolasipi nei ua ofo atu e le faletupe.
O le to‘a 58 e aofia ai tama ma teine aoga i aoga maualuluga mai i Upolu ma Savaii.
O le aofai la lea o le tupe ua foai atu mo nei sikolasipi ma togiga aoga e $16,000 (tala Samoa) ma na ta‘ua e le pulega o le Faletupe e faaauau i tausaga uma le latou fesoasoani lenei.
O se tasi o polokalame a le Faletupe ua faatautaia ina ia toe faafoi atu ai le faafetai i le talia e Samoa o le auaunaga a lenei faletupe ma ua faaauau ona vaaia le malosi o le lagolago a tagata o le atunuu e ala lea i le teuina o tupe i le Westpac.
O le Westpac na o latou faatauina le faletupe lea na ta‘ua o le Faletupe o Fefaatauaiga a le Pasefika, Pacific Commercial Bank ae faatuina loa ona lala i Samoa nei.
O le sui o le Malo i lea sauniga na tauaao atu ai lenei fesoasoani i fanau, o le Fetalaiga ia Tuuu Anasii o le Minisita Lagolago o le Matagaluega o Aoga ma na ia faafetaia lenei fesoasoani ua faatautaia i tausaga taitasi e lenei faletupe.
O le fesoasoani a le Malo ua faamalosia ai le totogiina o pili aoga poo le ta‘i $100 a le tamaititi aoga i aoga laiti (Primary Schools).
O le tausaga lona tolu lenei o lea polokalame a le malo ua galulue faatasi ai ma le Malo o Niu Sila ma Ausetalia.
Ae e gata i fanau o aoga laiti mai i le ta‘i lima tausaga seia oo ia i latou e 14 tausaga le matutua i aoga laiti ia.
O lea foi la ua faagasolo le totogi atu o pili nei o aoga a le fanau laiti i aoga taitasi o le atunuu.
O aoga maualuluga o loo faatino lava e mātua o latou pili aoga ma o fesoasoani faapenei e pei ona ofo mai e le Westpac ua toatele mātua ua maua ai le faamāmā avega i pili ma togiga aoga a le fanau.
O tuutuuga o talosaga i lea faletupe, e tatau ona vaavaai lelei i le iuga o taumafaiga a le fanau i aoga e ala i suega.
Ma o le fanau e mauaina sikolasipi nei, o tama ma teine e maualuluga a latou taumafaiga i aoga, petai ane e lē o lava le tupe maua a mātua e totogi ai o latou pili o aoga ma meaoga.
